台灣男子組合棒棒堂俾香港搖滾老大哥Beyond成員黃貫中（Paul）寸係「專業咪嘴」團隊，之後，棒棒堂班歌迷就炸爆阿Paul個blog，以Paul嘅性格梗係唔妥協，仲即刻再寸爆話：「佢哋（棒棒堂）三年後仲喺度先再同我講啦。」
噚日棒棒堂嚟香港宣傳新碟《我是傳奇》，喺大埔超級城搞咗個簽唱會，現場唱咗兩首新歌，今次佢哋唱live，見佢哋又唱又跳，搞到班fans嗌破喉嚨，之後仲同fans玩咗兩個遊戲。第一個係甜蜜蜜揸住fans手寫字，但威廉就將「我的傳奇」寫成「我的傅奇」，真係瘀到爆。之後棒棒堂再出冧功，用飲管傳橡筋時大玩法式接吻姿勢，搞到班女fans咿嘩鬼叫。講番俾前輩寸專業咪嘴，六子連聲否認，威廉仲好激動咁話：「我們唱live，我沒有咪嘴。」講到俾Paul狠批三年內玩完，佢哋異口同聲話唔會嬲，但就好唔開心兼有少少難過，佢哋話：「三年都可以在香港開演唱會是我們的希望，到時會親邀Paul做嘉賓。」講完阿緯仲即刻高呼「三年後再見！」一直係阿Paul粉絲嘅小煜表現得最唔開心，但佢話會繼續支持阿Paul。
棒棒堂噚日喺簽唱會度唱現場，講開阿Paul（小圖）話佢哋喺演唱會度咪嘴，佢哋堅稱冇咁嘅事。
