黃宗澤（Bosco）在劇集《烈火雄心3》飾演吊兒郎當、貪玩唔定性的消防初哥。現實中，年屆廿八的他，又多次被指是花心軟飯王，一時指他在女友胡杏兒家中黐食黐住，一時又搭上國產小花。
不過，本刊收到消息，一直租住沙田村屋的黃宗澤，最近密密睇豪宅，決心升呢做業主。
早年父母離異的黃宗澤，日前被記者發現帶同媽咪和家姐到沙田碧濤花園睇示範單位，主力睇千多呎望馬場景三房單位。
未來老公仔的起心肝置業，嚟緊三字頭的胡杏兒應該飲得杯落。
年初已經講明會實踐買樓計劃的黃宗澤，近日見樓市升番咁上下，擔心唔買遲些更難上車，近日即約經紀四出睇樓。由於他與母親一直租住沙田村屋，因此買樓仍揀沙田一帶屋苑。據知他意屬馬場一帶的駿景園、火炭御龍山和沙田碧濤花園。「佢住開村屋，對慣大自然，所以佢揀樓最緊要係個view，而且講明間屋面積要夠大，價錢反而係其次。」知情人士說。
專揀靚景三房
早前，本刊發現剛從大馬登台回港的黃宗澤，駕車到沙田碧濤花園門口會合母親和家姐，然後由一名女地產經紀引領，駛入屋苑二期停車場。
「佢哋未上樓已經講明要睇三房以上嘅大單位，若果有四房仲好，對啲兩房單位完全冇興趣。佢哋都睇得好仔細，每睇一個單位都會問好多問題，尤其係佢媽咪同家姐，猛問啲渠同牆會唔會滲水，反而黃生就好少講嘢，主力睇個景、主人房同廚房。」
早前透露女友愛在自己家中用焗爐整麵包的黃宗澤，當日當然要為胡杏兒搵個靚廚房。
Facebook晒結婚相
出道至今，一直租慣樓冇打算置業的黃宗澤，忽然揼錢買樓，據知全因有個恨嫁女友。近日本刊發現在胡杏兒的facebook中，鋪了多張她和黃宗澤在07年為婚紗公司拍的結婚相。「其實杏兒同Bosco拍咗四年幾拖，感情一直都幾穩定。前兩年杏兒家姐結婚，杏兒不知幾羨慕，加上就快三十歲，生細路仔都係睇呢幾年，所以時不時都問Bosco有咩打算。」知情人士說。
黃：唔想餓死老婆
本刊記者就買樓一事致電黃宗澤，他笑笑口說：「我係有心想買嘅，都睇咗幾個月啦。個樓盤（碧濤花園）自己幾鍾意，咪叫埋媽咪同家姐上去囉。（你睇親都係近千萬嘅單位喎？）睇定先啦，有錢都想同媽咪住大啲。（唔係同杏兒住咩？）吓，係你哋諗之嘛！（係咪杏兒催婚，所以你要買樓？）冇咁長遠，總之依家都係搵多啲錢先諗其他，我唔想餓死老婆瘟臭屋呀。」
逆市奇葩
黃宗澤自05年電視劇《我的野蠻奶奶》和胡杏兒撻着後，星途不單冇受影響，反而更入屋，除受廣告商歡迎，亦多次拍住胡杏兒組情侶檔到外地登台搵銀。去年尾，更簽約林建岳的東亞唱片公司做歌星，實行多線發展，短短一年，他已賺逾三百萬，難怪佢話已經儲夠首期買樓。- (id:kenwchch)
7月1５日下午4時，黃宗澤睇完樓後，記者趁機訪問他，他沒有回答，只笑着上車。
黃宗澤早前被指與胡杏兒在火炭浸會大學職員宿舍同居，因鬧分手而搬回沙田村屋舊居。向來花弗唔定性的黃宗澤，近日決定買樓，睇嚟同胡杏兒感情已漸入佳境。
黃宗澤在碧濤花園外會合母親和家姐後，便駛入屋苑停車場。
一家三口在樓盤睇足兩個鐘，手拎着售樓書的黃宗澤才和家人駕車離開。
除買豪宅外，黃宗澤早前亦換了這部價值四十萬的Audi旅行車。車、樓同樣升呢。
單位平面圖 黃宗澤一家當日主力睇的都是過千呎的三房面向馬場的大單位，呎價約5千元。
