近排香港o靚模群出寫真搶攻書展，被網民圍插亂賣肉，加埋爆出有o靚模私竇陪坐枱賺快錢，形象插水。
反觀日本o靚模就永遠煞食。21歲鬼鬼哋嘅黑木美沙，跳現代舞耍家之餘，拍戲、唱歌瓣瓣掂，今月中出處女寫真《LoveMeisa》露吓32C索女身材，一週內勁賣5萬本，成寫真銷量榜no.1；仲有20歲卜卜脆南明奈，最叻扮低B賣性感cutie，唔只電車男，連細路哥都勁冧佢，形象入晒屋；日模係咁露都冇出事，香港班o靚模真係同人唔同命喇。
3圍32C、24、34嘅黑木美沙最近出嘅處女寫真《Love Meisa》，由名攝影師Leslie Kee操刀，LeslieKee曾公開讚：「美沙擺甫士有動感有眼神，絕對係top model。」最近連大牌子Emporio Armani都搵美沙拍硬照做代言人。
樣貌鬼鬼哋的黑木美沙，媽媽係日本人，爸爸係美、日混血兒。出道5年唔只擔任《JJ》專屬模，更一直拍戲、拍劇樣樣掂，但最為港人熟悉，要數她今年於由香港導演李志毅執導嘅日式勵志電影《舞吧！昂》中飾演芭蕾舞蹈員。
主sell跳舞的美沙，原來12歲開始已沉醉跳現代舞，就算家拍劇趕戲每日至少抽出2粒鐘練舞、最近她於訪問中自爆：「試過一次放假，連續練舞練足4粒鐘，搞到背肌發炎，但我唔會放棄。」日日喪跳舞，身材唔fit至奇，最近美沙亦推出處女寫真集《LoveMeisa》，唔只半裸展露健美身材，更瞓身曲體擺出多個誘人甫士，㗎仔個個讚佢身材有健康美，難怪寫真集今月中出街，一週已賣出5萬本成寫真銷量榜冠軍。美沙有健美身材又有實力，香港班齋剝o靚模真係要學嘢。
南明奈低B脫
剛滿20歲的南明奈，出道3年一直剝住做水着偶像，雖然32A上圍冇乜睇頭，但勝在識扮蠢，每逢上電玩問答遊戲節目必大晒低B智商，最經典係被全世界苦主追債的「雷曼兄弟」都唔識，竟以為係新晉男子組合。電車男最buy佢笑容好又肯露，連細路都讚佢kawaii形象入晒屋。
低B妹有市，最近就擔正做恐怖片《咒怨2》女主角，上月更聯同遊戲節目《Quiz!Hexagon》嘅主持組成「南明奈的SuperMild Seven」，出細碟《I Believe~夢想成真的魔法語》，雖然雞仔聲，但有噱頭，一出即打入Oricon細碟榜no.4，呢期上晒位。
矢野未希子公主露
現年22歲，上年推出水着寫真《1st》的矢野未希子，雖然掹車邊做o靚模，但勝在有副babyface兼有31C咪咪，唔只㗎仔冧，連日本妹都讚佢氣質高貴，有日本傳媒更封佢做「模界公主」。有指未希子自上年2月出任日本OL時裝雜誌《non-no》後，該雜誌由每期40萬本銷量激增至50萬本，「公主」果然有號召力。
日模分類
近排喺香港o靚模泛濫，連譚校長都講笑話班o靚模靚嘅叫「中模艷」，唔靚叫「豬中模」，但喺日本做模唔理靚定醜，只隨年齡分4大類。
日o靚模先捱後露
日本做o靚模唔使高，5呎3吋已稱為模特兒，其中十居其九，擔任時裝雜誌專屬模起家，好似黑木美沙就先幫《JJ》雜誌拍硬照，然後先至拍戲或廣告，捱到有名氣先出寫真集賺快錢。
反觀近排香港一班o靚模就相反，未有名氣已先出賣肉寫真谷人氣。不過o靚模第一代Angelababy及Janice所走嘅路就近似日本o靚模，都係幫雜誌拍硬照做起，捱到有名氣先出寫真應市。- (id:kenwchch)
美沙唔只激舞，亦着上白色比堅尼擺出開牛奶甫士，性感得嚟又健康，唔怪得香港o靚模代表Kama亦出招派奶冧fans。
於今年3月喺香港上畫嘅《舞吧！昂》中，飾演天才芭蕾舞蹈員嘅美沙，雖有現代舞底，但坦言：「其實我之前唔識跳芭蕾舞，但我好勝要挑戰自己，苦練3個月終於能夠用腳尖跳舞。」
出名跳舞叻，5月中香港芭蕾舞團搞籌款晚會，亦邀請美沙做嘉賓，美沙到場時還被一群香港傳媒爭住做訪問。
CM入屋
低B妹形象入屋，最近更被健康飲品《Match》邀拍廣告，還特地飛去塞班島取景，廣告中南明奈只騷小蠻腰同玉腿，感覺唔鹹濕。
最近仲踩入影圈接拍恐怖片《咒怨2》，一向細膽嘅南明奈，喺拍攝期間曾嚇到大喊一場，要工作人員安慰先收聲。
5呎3吋高嘅南明奈，對住鏡頭經常笑晒口，最近有傳她因工作量大搞到患厭食症，體重由110磅減至96磅不特止，連32A Cup上圍都冇埋，變成砧板胸。
