早年喺無綫台慶扮嘢出位嘅李思捷，今年初同拍拖5年、02年落選港姐出身嘅無綫女藝員葉凱茵分手，搞到李思捷悶悶不樂，成日搵朋友吐苦水。不過，近日李思捷變得容光煥發，春風滿面，原來35歲嘅佢感情生活終於有着落，同年僅18歲嘅「美味天使」嘅春卷（王寶寶）拍咗拖3個幾月。
前晚7點幾，馮仁昭撞見李思捷同着住熱褲嘅春卷去圓方戲院睇戲，佢哋買飛揀位嗰陣企到貼一貼，講嘢時又哄到埋一埋，一睇就知道佢哋兩個唔係普通朋友咁簡單。買飛嗰陣，李思捷同春卷研究咗成分幾鐘先至有決定，李思捷掏荷包畀錢後，佢哋就有講有笑咁行入戲院。風趣嘅李思捷同春卷講咗幾句說話，仲到女方笑到見牙唔見眼。話時話，李思捷同女友拍拖嘅節目都係離不開睇戲，之前佢同葉凱茵去ifc拍拖睇戲，就係俾馮仁昭撞到正，估唔到今次又係咁啱得咁蹺喺戲院斷正喎！春卷噚日同馮仁昭承認前晚同李思捷去圓方睇《醉爆伴郎團》（TheHangover），但就死口唔認拍拖，佢話：「朋友啫！我之前喺外國讀戲劇，同佢都係鍾意睇西片，所以約埋睇一齊研究吓囉，我之前都有睇佢做戲，當佢係偶像。」至於李思捷至截稿前仲未有回覆。
三圍報稱33B、24、34嘅春卷王寶寶，話鍾意同李思捷研究西片。
