席捲全城的露肉o靚模熱回落，諸葛梓岐與江若琳昨日行泳裝騷，以密實吊帶沙灘裝示人。諸葛梓岐笑指身體被媽咪私有化，堅持私伙泳衣打扮只供家人和男友薛嘉麟欣賞。
諸葛梓岐（Marie）、江若琳和男子組合Square等，昨日在將軍澳出席商場海洋節活動。周立璟模特兒新女友Marietta與一眾外籍女模特兒，身穿比堅尼行騷兼下水濕身，Marie和江若琳則相對密實，只是穿吊帶裙或tube dress示人。
「我唔着佢最開心」面對現時o靚模瘋狂式賣肉，33C的Marie謂堅持不接內衣及泳衣騷，她說：「我身材都唔差，不過媽咪好介意我着泳衣，屋企人會嬲我，上次性感露背相媽咪都唔鍾意，呢啲私隱只係留畀同家人一齊先着。」只給男友薛嘉麟看？她笑說：「我唔着佢最開心。」男友私有化她身體？她即解釋說：「唔係，係媽咪私有化。」Marie又指賺錢不是最重要，就算到日本發展都不會放肆性感。提到周秀娜的人形攬枕惹來道德爭議，Marie說：「如果嗰個人接受到咪得，我自己就唔OK，見到啲人揸住（攬枕）嘅係重要部位，真係接受唔到。」
諸葛梓岐（左）與江若琳一個保私隱、一個自認身材差，齊齊以清爽沙灘裝代替泳衣出場。
