40歲嘅鄭嘉穎和34歲嘅佘詩曼，這對愛得癡纏又死唔肯認拍拖的當家小生花旦，日前再一次被本刊撞破幽會，其間鄭嘉穎更不惜踢女友落車，風度欠奉。
本月8日中午，有鄰居報料，指阿佘前一晚漏夜摸上鄭嘉穎位於西貢南圍村屋，記者趕到現場之際，剛好發現他駕車載住阿佘雙雙離開寓所。不過，當二人驚覺有記者尾隨跟蹤，顯得不知所措，男的踩油亡命飛車，企圖擺脫記者；女的則慌忙戴上口罩遮面。鄭嘉穎情急之下，竟狠心撇低女友，「冇面見人」的阿佘惟有無奈截的士逃離現場。
早前放風分手，實質玩地下情，藝人不愧偽人。
無奈解散
好事遭撞破，呢對戀人亦惟有無奈解散，阿佘手持的D-mop紅紙袋內，唔知係咪裝有衣物呢？至於鄭嘉穎，除咗阿佘落車一刻曾擰歪面瞄一瞄她，之後一直以後腦「得」住記者。
今年3月，本刊拍下鄭嘉穎駕車接載佘詩曼，當時阿佘戴上粉紅帽兼縮低身，鬼祟「屈佘」，遂令戀情首度斷正。事後阿佘強撐解釋，只因一同拍攝《宮心計》，男方才順路載她而已。不久更傳出愛蒲的阿佘嫌男方悶蛋，分手收場。
時間證明一切，兩人只是假分手，依然糖黐豆，女方甚至不避嫌到男方家中過夜。相信分手一事是有人故意放風。
今年3月，本刊拍下鄭嘉穎首度與阿佘同車，起初阿佘擘大眼講大話回應記者，否認是車中女子。報道出街後她才死撐說是一同拍《宮心計》（右圖）關係而同車：「嗰日放工，佢車我搭的士！」今次幽會，兩人再冇合作，冇得抵賴啦！
飛車路線圖
鄭嘉穎雖然03年尾以170多萬購入將軍澳蔚藍灣畔678呎單位，但多年來他寧願租住西貢南圍村屋，貪其免費有車位兼私隱度較高。而今次他載住阿佘撇記者的飛車路線是由南圍路開始，經西貢公路到達清水灣道的大埔仔村，才放低阿佘。由於當日鄭嘉穎車速甚高，駕駛這路程僅用了不足兩分鐘。
男笑談女封口
上周一（13日），穿背心的鄭嘉穎返回電視城拍攝新劇《鐵馬尋橋》，面對記者提問，他雖然未有承認與阿佘拍拖，但有問有答，表現頗大方。換上戲服後，他更拍拍記者手臂，表示：「我結婚一定通知你啦！」
cut線攝位
阿佘為了擺脫記者，駕駛途中曾經cut白線（左圖），入隧道時更強行迫旁邊車輛以圖先攝位，其妄顧交通法例的駕駛方法，與鄭嘉穎不相伯仲。
凌晨打的上樓
7月8日，有自稱西貢南圍的村民報料，指一位貌似佘詩曼的女子前一晚偷偷摸上鄭嘉穎位於南圍村屋的頂層單位，雖然接報時間已接近中午12時，記者把握時間到達現場，幸而剛巧發現度完春宵的鄭嘉穎，駕着其KW英文字母車牌的福士座駕載住阿佘離開家門，正駛到村口附近的南圍路。現場所見，二人為避耳目，均戴上鴨嘴帽遮掩，阿佘還刻意縮低身坐，從車後望去，幾乎看不到她的身影。「其實自從舊年阿佘俾村民踢爆打風嗰晚坐鄭嘉穎架車返南圍村之後，佢哋約會都好小心。阿佘就算上佢度，都會喺凌晨好夜至搭的士嚟，而鄭嘉穎接佢走嗰陣，都會望出露台視察一番，睇吓有冇可疑車輛啩！」知情人士說。
阿佘爆蒙面
當日記者甫見到兩人出車，即尾隨跟蹤，不久警誡心極強的鄭嘉穎已發現記者，遂極速踩油，以每小時100公里的高速沿西貢公路駛去，企圖撇甩記者。與此同時，記者又發現他身旁的阿佘雙手不停大動作地左郁右郁，後來才知她原來是急忙摷出口罩「蒙面」。看來今勻遭本刊記者撞破二人幽會，他們相當騰雞。
經過極速行駛近兩分鐘，鄭嘉穎深知難以逃之夭夭，途經大埔仔村村口時，他一個扭軚入村，以九秒九速度叫阿佘落車，當時阿佘刻意將帽子㩒到最低，口罩亦戴到上眼邊，認真誇張。其間記者不停嗌住阿佘，但她借咗聾耳陳隻耳，急忙上了一部的士離去，而鄭嘉穎亦「U turn」急急返家。
「屈佘」一向是佘詩曼的作風。早年她坐在緋聞男友吳卓羲座駕後座位（中途爬到前座）到上環中港碼頭。事後吳卓羲發現有記者，頭耷耷十分鬼崇（右圖）。
鄭嘉穎：結婚至會認
上周一（13日）下午3時，鄭嘉穎駕着當日載阿佘的座駕返無綫拍新劇《鐵馬尋橋》。記者上前訪問，他似乎有備而來，不斷說：「我冇嘢好講喇，多謝大家關心，我要趕住開工。」待他到服裝間換上唐裝戲服後，記者再次問當日為何踢阿佘落車？他遞起手：「我冇化妝，你唔好影我住！」之後更突然加速跑去化妝間，並笑說：「我同你鬥快吖嗱！」半小後，化好妝的鄭嘉穎終於肯企定定接受訪問。
記：嗰日做咩見到記者，就要阿佘落車呀？
鄭：……多謝關心。
記：你同阿佘依家感情已經好穩定？
鄭：（想掉頭走）多謝關心。
記：有人目擊佢（阿佘）夜晚上你屋企喎。
鄭：多謝大家關心，我冇嘢再發表喇。
接着，記者將他當日踢阿佘落車的照片遞給他看。
鄭：（未看清楚，便搶先說）你唔使俾我睇喇。
記：係嘅，梗係唔使睇啦，你都清楚晒成件事。
鄭：總之我冇嘢再講，我都明白你哋都係做嘢。
記：你年紀都愈嚟愈大，拍拖好正常啫，係咪驚fans唔鍾意至唔公開？
鄭：我唔係擔心fans點睇，我嘅立場係唔會講感情事嘅，我一路都唔講，冇理由依家無端端講吖！
記：咁女方可能需要名份嘛？
鄭：……總之多謝大家關心啦！
記：唔通結婚都唔認？
鄭：唔係呀！我結婚至會認！
記：咁希望你今次成功啦！
鄭：（捉實記者手臂笑說）嘩！你唔好套入佢（指阿佘）嗰度！總之我結婚一定會通知你啦！
阿佘堅持封口
至於近日未有工開的阿佘，自從被撞破與鄭嘉穎幽會後，連日來都足不出戶，直至13日下午，她才駕着七人車離開北角寓所，充當柴可夫送一名中年女子到西貢。停紅綠燈期間，記者曾上前敲過阿佘車窗示意訪問，但她堅持封口不作回應。
阿佘和鄭嘉穎似乎表現一致，選擇迴避緋聞。但據知34歲的阿佘自知年紀唔細，眼見近年不少同齡女星結婚產子，她亦渴望找個可付託終身的結婚對象。自去年中與鄭嘉穎撻着後不久，她已私底下找過幾位玄學家計算二人八字夾唔夾，「鄭嘉穎下個月就40歲，但佢事業心好重，加上呢幾年爬到上一線位，所以冇諗結婚問題。阿佘把口話冇所謂，其實都不知幾心急，問玄學家都係想知鄭嘉穎係咪佢真命天子，唔想嘥自己時間啫。半年前佢仲向鄭嘉穎探過口風，睇吓佢點睇結婚件事㖭，既然無綫亦御准佢哋情侶檔演出，阿佘好希望觀眾慢慢接受佢哋囉！」知情者透露。
拍檔點睇
《烈火3》首集播映已有36點收視佳績，破了3年以來劇集首播紀錄。一班演員對於「卓sir」鄭嘉穎與佘詩曼玩地下情，各有意見，就連陳總都揶揄一番。
陳志雲：天真冇人認得
對於旗下小生花旦地下情被撞破，無綫總經理陳志雲表示不覺得有搞地下情的需要，因為藝人也需要戀愛生活，但談到他們居然戴帽兼口罩封面，陳總就忍不住揶揄一番：「斷估佢兩個都唔會天真到以為咁做就會冇人認得吓嘛！咪好似以前明星咁戴太陽眼鏡，戴咗咪仲衰過唔戴！係咪佢哋感冒，唔想惹人至啩？哈哈！」
珠姐：冇咁嘅男友
在《烈火3》扮演黃宗澤阿媽的陳秀珠說：「如果我係嗰個女仔（指阿佘），我就一定唔會有個咁樣半路踢自己落車嘅男朋友囉！更加唔會戴口罩拍拖咁焗啦！哈哈！」
周聰：使乜遮掩
周聰在該劇扮演黃宗澤外公，與鄭嘉穎都曾有對手戲，但他表示未見過阿佘來探班。對於兩人鬼祟拍拖，周聰笑說：「兩情若是久長時，又豈在朝朝暮暮吖！真係非見不可嘅話，都唔使咁吖，大大方方，拍拖咪拍拖囉，又唔係犯法，使乜遮遮掩掩，一係好似胡杏兒同黃宗澤咁囉，奉旨同場演戲就唔使約啦！」
死敵王喜耍手
雖然陳總和演員都直指鄭嘉穎和阿佘的幽會行徑鬼崇，但因拍《烈火3》而與鄭嘉穎屢傳不和，甚至承認與鄭唔係朋友的王喜，見到記者遞上的鄭佘同車照時，反而十分避忌，望了一秒就耍晒手話：「呢啲嘢我冇意見俾！」
速逃避緋聞
藝人唔想戀情浮面，往往情願爆速逃，總好過當場被捉到正。翻查紀錄，男方踢女方落車來逃避緋聞，除了今勻鄭嘉穎之外，陳冠希等人亦曾經試過。
陳冠希撇Rosanne
04年，陳冠希與2R組合Rosanne的緋聞甚囂塵上，同年7月二人被發現到中環IFC拍拖睇戲，散場後往停車場取車期間，Edison突然發現記者，嗱嗱聲叫Rosanne落車，自己隨即開車走人。
傳宣萱逃離羅嘉良座駕
羅嘉良和宣萱多次被傳戲假情真，拍完《流金歲月》，緋聞依然未斷，至02年尾，羅嘉良一次意外撞車，有傳當時宣萱正在車內，但發生事故後，先行「較腳」，才令緋聞不致斷正。- (id:kenwchch)
真係爆！（設計對白）
亡命飛車 本月8日，載住阿佘的鄭嘉穎駛經其村屋必經的南圍路時已發現記者，隨即以時速100公里「速逃」，記者車亦一度被他拋離。
冇面見人 儘管記者叫住她，但戴上鴨嘴帽，口罩罩到上眼的阿佘依然懶理，急步上的士鬆人。
U turn閃 與此同時，鄭嘉穎已經以極速u turn，折返其村屋。待記者趕回其村屋，他快到已經上咗樓。
