張震前晚以德國房車品牌Audi大使身份，現身將軍澳邵氏影城，同場還有混血模特兒Amanda S.、Lisa S.及陳志雲等擔任嘉賓，出席慶祝百年的晚宴。
曾與舒淇拍攝《最後的時光》後傳緋聞的張震，對於近日舒淇盛傳與馮德倫撻着的報道，他說：「我有睇過報道，不過唔知佢係唔係拍拖，作為朋友，人哋私生活唔理，如果打電話去問就更加奇怪，如果佢有好消息，都會通知我啦。」有否甩難感覺，他說：「不嬲冇乜緋聞好講。」
練功無暇拍拖張震透露近日忙於為新片《一代宗師》秘密訓練，亦十分關注梁朝偉手部的傷勢：「佢好勤力訓練，希望佢快啲好番，自己訓練時都有受傷，不過冇佢咁嚴重，最多都係打瘀。」問張震現在有否拍拖，他即耍太極表示：「家喺北京訓練好辛苦，連屋企人都見唔到，邊有時間拍拖。」
