《烈火雄心3》首播已創出最高37點的收視佳績，繼《巾幗梟雄》後成為近期被觀眾熱捧的劇集。劇中的靈魂人物，連續三輯有份做男主角的王喜，一直有傳他繼上輯後，今輯再度慘死收場，不過本刊卻得知結局嘅真實版本。
王喜今輯的經歷相當坎坷，先昏迷失憶、再斷腳要裝義肢，最後為救鄭嘉穎仲搞到斷埋氣，雖然最後奇蹟生還，不過女友胡杏兒就俾鄭嘉穎搶走。既要做跛佬又係情場大輸家，唔怪得王喜早前講起唔會再拍《烈火》系列時，喺鏡頭前喊得一句句啦！
結局斷氣逐格睇
鄭嘉穎和黃宗澤在電鍍廠被困密室，熟識地形的王喜到場後，鑿牆救兩人離開。
王喜終於找到出口，由於黃宗澤已受傷，鄭嘉穎先扶他離開，點知再有爆炸，王喜走唔切，出口再被封。
王喜獨自留在火場，面對不斷發生的大爆炸，生命危在旦夕。
王喜為避爆炸及大火，整個人躲到大水缸內，此時鄭嘉穎等同袍，決定再入火場救他。
鄭嘉穎終於救出王喜，可惜替他做人工呼吸後，他依然沒有知覺，眾人非常傷心。
最感動王喜劇情──跛腳
王喜：「第21集我會發生交通意外，右腳斷咗要裝上義肢，戲裏面會詳細交代裝義肢過程，監製搵咗一個傷殘人士做我替身，令成段戲更真實。好多謝嗰位傷殘人士同我分享好多經歷，對我嘅演繹有好大幫助，可惜社會對傷殘人士仲有歧視，雖然我唔可以公開佢身份，但都好感激呢個無名英雄。」
王喜在劇集中段昏迷蘇醒後一度失憶，以為已和他分手的胡杏兒仍是女友，當發現她已跟鄭嘉穎一起，一時不能接受，開車追着兩人時發生交通意外。
炒車斷腳 王喜開的車在天橋墜下，令他右腳嚴重受傷，被困車廂。
鄭嘉穎和胡杏兒將王喜救出，兩人感到相當內疚，令剛開始的感情受到考驗。
事後王喜右腳膝蓋以下全被切除，他起初不能接受跛腳的事實，徒弟黃宗澤不斷鼓勵他，令他重新振作。
《烈火3》共有32集，劇情一開始就鋪排王喜飾演的鍾有成跟鄭嘉穎飾演的卓栢宇不和，雖然今周已交代兩人冰釋前嫌，但好戲在後頭，下星期開始王喜將進入人生最黑暗時期。
死過翻生
劇情將會交代王喜在一場公屋大火中發生意外，變成植物人，昏迷3個月蘇醒後又不幸發生交通意外，令右腳截斷，需裝上義肢。王喜之後被調到防火組擔任文職工作，不能再做消防員，因此變得鬱鬱寡歡。
而結局講到當王喜得悉電鍍廠大火，好友鄭嘉穎和徒弟黃宗澤被困火場密室。由於只有他知道密室位置，最後他得消防當局允許親身到場成功救出他們。但王之後卻被大火圍困，大爆炸後被救出時已經斷氣失去知覺。鄭嘉穎親自為他做人工呼吸，依然沒有起色，但劇情最後會交代王喜奇蹟生還，好人有好報。
鄭嘉穎搶走胡杏兒
除了王喜條命仔受關注外，大家最關心就是胡杏兒飾演的高惠盈情歸何處。劇集一開始講述王喜和鄭嘉穎同時愛上胡杏兒，及後王喜正式和杏兒拍拖，嘉穎黯然，之後便和李亞男發展另一段感情，但自從下星期王喜昏迷後，鄭嘉穎先發現最愛胡杏兒，兩人還正式拍拖。
可惜王喜蘇醒後發現兩人關係，搞到撞車斷腳，令鄭嘉穎同胡杏兒非常內疚。王喜斷腳康復期間，簡慕華飾演的護士何姑娘曾向王喜示愛，王喜最初沒有接受，還因對胡杏兒未能忘情一度自殺，而胡杏兒為免再傷害他，決定放棄跟鄭嘉穎結婚離開香港。不過最後胡杏兒會重投鄭嘉穎懷抱，王喜則會接受簡慕華。
未能忘情 王喜昏迷3個月蘇醒後，忘記已跟胡杏兒分手，當發現她跟鄭嘉穎在一起，即時晴天霹靂。
跪地求情敵讓愛 王喜跛腳後沒有放棄對胡杏兒的感情，還苦苦哀求鄭嘉穎將女友還給他，但鄭嘉穎堅決不肯再讓愛。
忍痛退出 王喜向胡杏兒表白不會放棄她，還會不斷努力追求她，希望她能回心轉意。不久王喜發覺胡杏兒心裏只有鄭嘉穎，不會再接受他，惟有退出成全兩人。
患難見真情 王喜退出後，胡杏兒被大耳窿捉走，王喜到場救她時齊墮漁塘，這時王喜發覺最愛始終是胡杏兒。
胡杏兒：長痛不如短痛
對於夾在兩男之間，胡杏兒話：「如果我係高惠盈，一定唔會咁婆媽，我唔會犧牲自己嘅愛情咁偉大，因為長痛不如短痛，逼自己同一個唔鍾意嘅人一齊，反而會令到三個人都痛苦。」
王喜就話：「當一個人鍾意你嘅時候，你嘅心思心意會叫做愛，但當佢唔再鍾意你嘅時候，呢啲竟然變成罪，我只係想同阿盈講，唔鍾意唔緊要，但唔好避電話，呢個分手方法衰過發短訊講分手。」
自殺力挽舊愛 王喜未能對胡杏兒忘情而企圖自殺，令本來答應跟鄭嘉穎結婚的胡杏兒，忍痛取消婚約離開香港。
另覓新歡 大火後起死回生的王喜，明白世上不止胡杏兒一個女人，最終接受護士簡慕華的愛意。
黃宗澤奉子成婚Happy Ending
劇中黃宗澤跟陳茵媺這對鬥氣冤家，好快就會撻着，拍拖無幾耐仲搞到奉子成婚，由於兩人依然是大細路，又對工作充滿熱誠，兩人都不想抽時間照顧BB，因而產生不少摩擦，令婚姻一度亮起紅燈，但最終都大團圓結局。
鬥氣戀人 黃宗澤最初以為性格衝動的陳茵媺有自殺傾向，後尾發現對方原來係女警後，開始對她改觀。
一擊即中 孤兒出身的陳茵媺性格主動，跟黃宗澤發生關係也由她作主動，兩人一擊即中，結果要奉子成婚。
大肚婆出意外 腹大便便的陳茵媺和飾演鄭嘉穎妹妹卓敏的姚子羚，在棚架倒塌意外中受傷，令正在另一場火災救火的黃宗澤相當擔心，幸好最後母子平安。
黃宗澤：「最難忘係俾陳茵媺擒住，我就半推半就獻身俾佢啦！嗰場戲搞笑中不乏激情，好在我同陳茵媺都忍得笑，好快拍完！」
下周高潮預告：王喜變植物人
下周第11至15集劇情，講述王喜和鄭嘉穎和解後，再度在一場公屋大火中攜手合作救火，兩人救出大部分傷者後，一同聽到一名女孩求救聲音，於是返回火場，之後突然發生大爆炸，令兩人通訊中斷，結果同告受傷，王喜更長期昏迷變成植物人，幸好3個月後蘇醒。
由於這場公屋大火火勢嚴重，要動用王喜和鄭嘉穎兩組同時出動。
王喜和鄭嘉穎在火場6樓發現小女孩，並將她救出後，卻避不過大爆炸。
鄭嘉穎受傷昏迷被抬出，幸好只是皮外傷沒有大礙。
同告受傷的王喜，被抬出時不但昏迷，還滿身鮮血，令父親江漢及胡杏兒相當擔心。
