張家輝今年憑《証人》獲得香港電影金像獎影帝，王晶隨即請他與金像影后鮑起靜、最佳男配角廖啟智、女配角陳麗雲一起合拍新片《旺角監獄》。家輝飾演患上精神分裂的釋囚，對他來說確是演技大挑戰。張家輝由99年開始演出王晶一系列的賣座喜劇，但到了03年他改變戲路，演出了多部由杜琪峯執導的槍戰和黑社會電影，演技備受認同，更憑演出林超賢的《証人》贏得今屆香港電影金像獎影帝，領獎時他念舊地多謝王晶，所以當王晶邀請他演出電影《旺角監獄》，他即一口答應。不過今次不是拍喜劇，而是一部題材嚴肅、探討社會問題的電影。
王晶希望找一批有演技的演員參演《旺》片，所以邀請了今屆香港金像獎影帝家輝、影后鮑起靜，最佳男配角廖啟智與最佳女配角陳麗雲演出。張家輝昨日接受電話訪問說：「呢部戲個劇本唔錯，所以我接咗，但年底我會先拍王晶另一部古裝搞笑戲。」
王晶已多年沒有執導這類嚴肅題材的電影，昨日他在電話中說：「偶然我都會拍吓呢啲題材嘅，其實部戲係講一個17歲青年被寃枉斬死人，結果坐咗30年寃獄，出獄後住喺旺角，但佢患精神分裂，仲以為自己喺旺角呢個大監獄坐緊監。呢個角色會由家輝做，陳麗雲就演一直輔導佢嘅社工，鮑起靜就做家輝嘅阿媽，一直唔肯接受個仔坐緊監，以為個仔只係移民，到個仔出獄後，鮑起靜又不幸患上老人癡呆症，部戲係講一啲社會問題，絕對冇搞笑成份。」
與美女合照遭利用
美少女廚神佩佩與張家輝這幅合照，被人拿來做宣傳，令家輝很失望。
此外，本報昨日收到匿名電郵，電郵中有一幅張家輝與美少女廚神佩佩的面貼面合照，記者昨日問家輝，他說：「我曾經上過無綫嘅《美女廚房》，當晚錄影時邊個行埋嚟要求合照，我已經唔記得，不過當晚錄影完就返咗屋企。我哋做公眾人物，人哋要求合照，我善意答應，但出咗嚟張相竟然變咗質，都幾失望。」
