除咗張惠妹高調承認戀情，平日甚少提及感情事嘅言承旭，同樣响電視清談節目入面，默認同林志玲有過一段甜蜜戀情，分手後更寫下一封無膽寄出嘅懺悔情書。
失敗男友
呢排台灣嘅清談節目，變成爆料真人騷，就連平日出名難搞嘅言承旭，都响節目中盡訴心中情。
當日言承旭自爆曾經有過一段極之甜蜜嘅愛情，响佢做緊model 嘅時候萌芽，出道加入F4 後結束，持續多年，至於分手原因，言承旭話：「可能自己還不夠好吧，我很孩子氣，沒自信、不溫柔、不浪漫、不會撒嬌、不會甜言蜜語……」
自數多宗罪，言承旭之後大讚舊女友「她很棒」、「她真的太好」，好處多到數唔晒。
答案吻合
因為女友實在太好，响分手之後，言承旭曾經寫咗封懺悔情書，可惜無勇氣寄出：「如果自己沒有那麼好，寄出後，會不會讓她從此掉入不幸福的開始。」
至於呢位絕頂好女友真正身份係邊個？主持人沈春華兜咗個圈問：「你說的就是演唱會也在場的那位嗎？」言承旭當時露出靦覥笑容，默認一切。
去年言承旭去日本開演唱會，响台上話：「有我很重要的人到場，謝謝志玲。」！仲唔係你。
言承旭之後愈講愈白：「她有次生病，我很緊張，打電話給侯文詠（知名作家，言承旭老友）幫忙介紹台大好醫生，後來她找到好醫生，這事（介紹醫生）我當下沒講，她覺得我不關心、不緊張，覺得很委屈。」
四年前意外墮馬嘅林志玲，咁啱又係住台大醫院，呢段舊情史答案，絕對呼之欲出。
02 年，剛剛成名嘅言承旭，俾人影到同林志玲拍拖睇戲，當時兩人未有承認戀情。
入行28 年嘅沈春華，去年憑《沈春華Life Show 》節目，獲「最佳綜合節目主持人獎」，受訪嘉賓個個有番咁上下分量。
罕有地大談情史嘅言承旭，被主持人沈春華追問嗰封懺悔情書，而家會唔會寄出？言承旭猶豫咗一陣先答：「不知道，真的不知道！」
