o靚模趁夏日空群出動，大眼con 濃妝日系look ，引到電車男心甘情願排隊逼爆信和買寫真集。化個靚妝的確吸引，但長期用厚粉遮蓋臉容，皮膚冇得透氣，容易引起皮膚敏感，除了model 外，需經常化妝上班的如美容顧問及OL 等，都屬高危一族。一旦皮膚敏感，生滿成臉粒粒，愈用化妝品遮蓋，情況就愈惡化，分分鐘會起水泡、生厚繭濕疹，到時就難以根治，不想皮膚敏感斷送前程，就要防患於未然。
皮膚敏感有多種，關嘉美醫生說長期化妝、換妝，令皮膚冇機會透氣，毛孔閉塞，得不到適當的休息，加上不同種類化妝品，可能含有對個別人士容易引致敏感物質（如酒精、水銀、礦物等），導致接觸性過敏皮膚炎的機會大大增加。接觸性過敏皮膚炎病徵包括患處痕癢、皮膚出現紅疹及腫脹，嚴重者可能會形成皮膚爆裂並結痂。
換妝變臉 搞到生粒粒
兼職模特兒Connie 入行2 年，初入行時因接job 搞到面頰上生滿粒粒，結果光顧皮膚科醫生，證實有接觸性過敏皮膚炎，被迫停工1 個月。「有一次接咗一個為期3日嘅fashion show ，每日最少換3 個妝，唔同牌子嘅厚粉胭脂係咁換，做完個show 第二日起身，塊面已經勁痕，生滿一粒粒小紅點，即刻走去睇醫生。醫生話我接觸太多化妝品，當中可能有啲物質係致敏原，引致接觸性過敏皮膚炎，係模特兒最容易患上嘅皮膚敏感種類。好彩我只係輕度敏感，除咗開消炎藥畀我，醫生提議我卸妝一定要乾淨徹底，清潔後畀皮膚唞幾分鐘先擦補濕護膚品。如果許可嘅話，盡量同化妝師講用番慣用牌子嘅化妝品，好似粉底、胭脂，避免皮膚接觸其他致敏原。我照足咁做，成年都冇翻發過。」
防皮膚敏感2 大招：
各位o靚模，唔想成日化妝搞到皮膚敏感，生晒粒粒，由女神變巫婆的話，就要聽關嘉美醫生講，化妝之餘，要盡量讓皮膚唞氣，咁就冇咁易患皮膚敏感喇！
1 落完妝唞15 分鐘
返到屋企要徹底落妝，落妝後不要立刻搽護膚品，要讓毛孔透一陣氣，15 分鐘以上就最理想，「如果塊面好乾，最好選擇一啲水溶性、較溫和嘅lotion ，唔好用一啲好油嘅潤膚膏撻上塊面，否則啲皮膚都好難唞到氣。」
2 補妝前濕毛巾冰敷
如果job 接job 頻密換妝，關醫生建議model 將一條濕毛巾用保鮮袋包入雪櫃，在補妝前或趁換妝時，將冰凍濕毛巾敷在臉上約3 至10 分鐘，讓焗足一日的皮膚得到紓緩。「如果工作地點附近冇雪櫃，可以買包冰凍飲品，用毛巾搵保鮮紙隔住包住飲品，再將毛巾敷上面，一樣可以紓緩到啲皮膚。」
請按『讚好』，接收更多相關主題。
如果您喜歡這篇文章，請按「讚」或分享給您的朋友，以示鼓勵。
