首席o靚模Angelababy （楊穎）出道至今一直被指整容，上月從日本返港的她，被發現樣貌變得更精緻，顴骨變高、鼻翼收細、面形削尖、嘴唇開刀，似進行過大型修葺工程。
對於上述指控，Angelababy 終於忍唔住發火，「今次真係好過分，唔好成日屈我，我可以發誓我無整過。」為洗脫嫌疑，Angelababy 更提供多張由三歲到十六歲的童顏照，力證美貌「無添加」。
由出道至今不斷俾人話整過容，Angelababy 一直忍得就忍，但最近被指簽約日本Avex Group ，六月中由日本工作返港後，五官離奇變得更靚更細緻，又搵埋整容顧問及整容人袁彌明加鹽加醋講到似層層，群起指證Angelababy 塊面一定做過手腳。
由於事件愈鬧愈大，加上愈來愈多人信以為真，Angelababy 終於忍無可忍決定㷫爆反擊。近排忙於做寫真集後期工作的她，專登摷出一批由三歲至十六歲的童年照，公開俾外界逐個部位對照，還她無添加清白，「今次我真係好嬲，已經唔係第一次，但一次比一次寫得過分，唔好成日再屈我，我一早講過，我淨係十五歲至十七歲嗰段時間箍過牙，無做過任何整容手術，我可以發誓。」Angelababy愈講愈激動。
舊相力證
擁有四分一德國血統的Angelababy ，四歲大已經五官標致，與現在的她分別唔大；直到九歲因為哨牙關係，個嘴成日合唔埋，嘴唇顯得較厚。
「其實我嘴唇一向屬於厚嘅類型，因為之前有哨牙，箍牙嘅牙箍將嘴唇更加頂出嚟，所以先會有孖膶腸效果，拆咗牙箍之後就正常番晒，出面講到我做過割唇手術，又話嘴唇有疤痕實在太恐怖。我細佬依家都箍緊牙，佢嘴唇都變得粗咗。同埋以前細個唔識著衫同化妝，搞到個樣好娘，所以大家會有錯覺，認為我同以前分別好大。」Angelababy 說。
今次寫真遠赴法國拍攝，由於成本昂貴，所以寫真集售價都比其他o靚模對手貴，不過身為上年書展大贏家的Baby 毫不擔心，「今次好多靚景靚衫，一定物有所值。」
寫真大戰
Angelababy將會响七月廿二日書展中，推出第二本寫真《Miss Angelababy 》，面對一眾o靚模群起剝衫拋波，Angelababy 決定「升呢（level ）」有別一眾只識拋波o靚模，寫真集飛到法國巴黎取景，走高檔fashion 路線，據聞書中有一輯著住三角褲典床典蓆誘惑床照，噴血程度極高。
面對一班後起o靚模，身為一姐的Angelababy ，並唔贊成時下的肉搏風氣，「其實呢個風氣（露肉）唔係咁好，有時見到佢哋真係有少少過火，其實性感唔一定要露得好多肉，好暴露，性感都可以好健康同漂亮。」
對於近期一眾o靚模拋波接job ，好似周秀娜隨街剝衫，Lavina 專登露乳貼，Baby 都睇唔過眼。
16歲 傳媒多數攞這個時期Baby 相片做對比，當時Baby 個樣的確幾嚇人，但她解釋因為唔同人化妝同影相角度問題，加上當時箍牙導致口腫面腫。
15 歲 細個唔識打扮，加上哨牙，睇落的確娘爆，但五官又真係同而家唔大分別，除咗棚哨牙。
6 歲 細細個Baby 已經鍾意影相，仲識得擺pose 搶鏡。
4 歲 小朋友時期，Baby 五官已相當精緻。
