唔知天至點解會簽佢Janice Man
o靚模鬥少布鬥爛做，反而第一代o靚模Angelababy 同文詠珊(Janice Man)就升呢洗底，Baby 早前以500 萬賣身日本唱片公司Avex ，為免被好姊妹拋離，入足半年雪房嘅文詠珊(Janice Man)，月初終於逃出生天，拍板加盟黎明經理人公司。
老闆黎明期望大，更要求經理人陳善之將JM 打造成第2 個李嘉欣，據知黎明定出4 大家規，包括禁行MK 兼嚴打同居，仲要講明唔接夜場job ，更委派黎明御用髮型師Sev 為JM 大執，務求洗走o靚模味。JM 有黎明照起，嗰半年雪房，抵入啦！
衣着減MK 味
上週五（3 日），JM 泊掂黎明碼頭，又有陳善之做經理人，咁多明燈，JM 心情靚靚試新造型，拉直咗把頭髮嘅佢影完相仲同阿Yu 和工作人員去九龍城合成食糖水，其間問到JM 幾時正式公布加盟Amusic ，JM 就淨係識話：「多謝晒，唔該辛苦晒！」講應對，JM 仲有排學喎！
阿Yu 執靚
黎明搵嚟轉咗做潮流雜誌記者嘅阿Yu 入Amusic 做styling ，又安排佢幫文詠珊(Janice Man)做image ，問阿Yu 點幫JM 轉look ，阿Yu 就話：「佢之前太o靚妹，佢家可以試吓成熟啲，少啲着日本街牌，其餘Gucci 、Chanel 都可以畀佢試吓嘅！」其實阿Yu 今年都係26 歲，大JM 6 年咋喎。
老闆娘讚
Leon御用髮型師Sev 幫JM set 頭，有傳Leon 有意搵老闆娘幫JM 升呢，不過樂基兒話：「我哋食過1 次飯，我覺得佢好有potential ，不過Leon 公司嘅嘢，你問番佢啦！」
猛人開路
黎明經理人陳善之主力負責黎明旗下藝人及百事活經理人公司業務，又有多個Amusic 藝人包括衛蘭、衛詩都係佢照顧，佢仲係李嘉欣經理人，多年來為李嘉欣拆解過唔少風雨，有佢幫JM 開路，JM 偷笑啦！
20歲文詠珊（Janice Man ）年初因為唔肯同舊公司STARZ People 續約，被公司老闆鄒世龍即時送入大雪櫃，半年冇咗影原來佢暗盤已經泊掂黎明碼頭，簽約黎明經理人陳善之打理的百事活公司，據知JM 十年賣身契身價過千萬。
想變李嘉欣
JM自從被舊公司雪藏後，一直游手好閒迷失大半年，至上週五（3 日），女神終於全面復工，於柴灣一影樓拍攝模特兒宣傳照，同行除有助手、司機外，仲有黎明御用髮型師Sev Tsang 和已退出娛樂圈、曾轉行做潮流記者的英皇小花趙頌茹阿Yu （現改名趙梓淇）做形象指導傍到實。知情人士說：「Leon 同阿Joe （經理人陳善之）都好緊張Janice Man ，話晒Janice 係佢哋第一個簽嘅模特兒，所以阿Joe 已經一早同啲品牌打晒招呼，講真阿Joe 之前幫李嘉欣接落咁多勁牌子，是但彈兩個畀Janice 都冇問題，所以Leon 有信心將Janice 變做李嘉欣2 世㗎！」
唔准行旺角
一口氣簽足10 年，據知黎明為保JM 形象，亦定落4 大家規要JM 遵守。知情人士說：「Leon 講到明Janice 再出嚟要貴氣，接嘅嘢都要sell 高貴，唔會接酒吧騷、行cheap 場，佢亦唔可以再行啲人多嘅地方好似旺角咁，費事成日俾人影到周街行！仲有公司都唔想佢再同男友同居，自己搵地方搬，最好係香港區啦，不過公司知佢住開荃灣梨木樹邨，佢想近番屋企人都冇所謂嘅，總之唔好同男友住啦！」
對於Leon 定4 大規條幫JM 升「呢」，其經理人公司發言人沈小姐說：「冇話乜嘢家規嘅，總之公司有全盤計劃捧Janice ，公司對佢好有信心。」有黎生照住，莫講4 條家規，40 條都照守啦！
黎總新家規
據知JM 10 年長約袋千萬，條件咁優厚，當然有條件！黎明亦實行當佢係明星執到正，都明嘅，初歸新抱唔教嚴啲，好過日後多過衛詩咁嘥心血啦！
家規1 禁公開拍拖
20歲JM 同男友阿峰愛得高調，成日拍住拖行街，早前本刊便影到二人於沙田拍拖行Homeless 傢俬鋪，兩人仲好唔避忌咁拖住手，但係老闆介意，咁以後拍拖就要鬼祟啲啦！
家規2 禁同居生活
家住荃灣梨木樹邨的JM ，經常在其男友的荃灣朗逸峰家中過夜，黎生即時下令JM 要搬竇，屋邨同朗逸峰都要講bye bye 。
家規3 守坐保母車
以前JM 開工要自己坐車去現場，上週五（3 日）JM 去柴灣影相，有保母車全程接送，原來黎生規定凡係工作時間，JM 出入均要由公司保母車接送，其餘時間亦只可以的士代步，不過JM 其實多坐男友車，而且JM 又啱啱考咗車牌，買車畀自己揸都係遲早嘅事！
家規4 禁夜場走騷
過去JM 曾經投訴過舊公司亂接酒吧騷，而黎明亦講到明唔會要JM 行酒吧騷，而JM 平日亦唔可以行啲人多嘅地方如MK 等地，夜蒲都要蒲中環，一洗MK 味，呢樣JM 應該唔反對。
接師姐棒
經理人陳善之亦出盡友情牌幫JM 拉廣告，加上已為人妻等生仔嘅李嘉欣隨時收山唔使撈，據知嚟緊一向同李嘉欣有合作關係嘅L'Oreal 亦有興趣搵JM 接棒，價錢亦由o靚模價10 萬跳至20 萬，同時亦有唔少品牌如Nokia 等睇中JM ，對於復出有價，黎明公司發言人沈小姐則說：「好多品牌都傾緊唔方便講，總之有消息會通知大家。」
李嘉欣01 年開始同L'Oreal 合作，8 年以來合作無間，今年6 月再為L'Oreal 拍攝新一輯去斑產品廣告。
名牌上身 06 年限量LV Squichy $16,000
拉直長髮 3/7 最新改造圖片
