書展722 殺到，去年寫真玩日系水着賣到斷晒市的Angelababy （楊穎），今年紅到去日本，由港模攻入日模界做潮書專屬模，兩個月前以5 百萬身價簽下日本殿堂級唱片及經理人公司的Avex ，做濱崎步師妹。
成功升呢，將於書展期間再推出寫真集《Miss Angelababy 》，級數狂升當然唔再玩o靚妹feel 水着。最近本刊從特別渠道得到Angelababy 新寫真集中的超V 照，據知今次轉玩高檔路線的Baby ，寫真耗資百萬巴黎製作，咁認真，唔怪得Baby 寫真於一眾索模寫真中定價最貴啦！超值呀！
20 歲Baby 舊年的水着寫真集大賣，今年經理人Kim 加碼豪使百萬飛到法國巴黎七日，幫Baby 搵名師CK 影第二本個人寫真集《Miss Angelababy 》，仲親自揸機影snapshot （大圖），難怪Baby狂讚經理人：「佢係我第二個媽媽，我要賺多啲錢回報佢同我屋企人吖。」
巴黎春光
Baby有份構思寫真主題玩黑白tone ，揀衫都親力親為：「今次部分衫係2%搵人幫我度身訂做，一共有過百套畀我揀，最後揀咗30 幾套帶過巴黎，泳衣都係健康性感為主。」而Baby 身上呢件白色deep V 泳衣，則購自巴黎，取景於自己酒店房陽台。
今年20 歲的Angelababy 處女寫真於去年書展大賣3 萬本，今年再下一城豪花過百萬全包星級班底，共14 人到巴黎拍攝第二本寫真集，Baby 誓言今次全力出擊，初版2 萬，隨時加印：「由4 月份開始構思、訂做衫，直到後期揀相、裁size 、調色同排版，我都參與。即使家每日瞓得3 個鐘，我都好滿足，好似生仔一樣咁期待。」今年一眾o靚模爭住以陽光海灘作背景晒水着，Baby 卻獨玩充滿Chanel 味的黑白型格，由少女品牌「2 ％」度身訂做黑白潮服：「寫真主要用黑白tone 。我喺巴黎每日由朝早7 點影到夜晚9 點都未天黑，用盡每日時間走4 、5 個景點，幾辛苦都值得。」唔怪得比起以性感比堅尼於書展血併賣$98 的周秀娜（Chrissie）寫真，以及賣$88 的羅凱珊（Kama ）無上裝寫真等，Baby 鐵價$128 未驚過。
