全智賢被問到想同邊個男星合作，佢就好識做咁話個個都想囉！
自爆係運動狂的全智賢，瘦到小腿青筋暴現，真係令人懷念以前有少少baby fat 嘅佢咯！
拍完《我的野蠻女友》後嘅全智賢，面圓圓襯長直頭髮，清新甜美，吸引咗大批少男fans 。
憑韓片《我的野蠻女友》而走紅嘅全智賢近日認真頻撲，因為佢最近忙於為佢擔正嘅荷李活電影《血戰新世紀》（Blood ：The Last Vampire ）四處做宣傳，日前先到咗香港宣傳嘅全智賢噚日就第四次到台灣，不過似乎台灣嘅影迷就唔多鍾意變得骨瘦如柴嘅全智賢，噚日仲只係得一個忠實死硬派fans 嚟接機，好彩全智賢嘅心情就冇乜點受影響，佢見到有傳媒接機時仲係咁揮手示好，一改以往好cool 嘅形象。
全智賢頻頻撲撲宣傳新戲，雖然去到台灣時影迷反應冷淡，好彩佢全程都有個經理人（左）細心呵護佢。
自爆變運動狂
噚日全智賢經過悉心打扮出席新片嘅記者會，27 歲嘅全智賢喺現場發表恨拍拖宣言，佢仲自爆家正四圍物色心水獵物，還透過繙譯自誇話：「我這麼漂亮，沒有男友真是好可惜呢！」不過睇嚟佢要增增肥先可以吸引到狂蜂浪蝶呢！
身為唔少男士夢中情人嘅全智賢仲坦言結婚係個唔錯嘅選擇，不過首要條件男方要包容到佢繁忙嘅工作，但佢都不禁嘆氣話要做到呢點都好困難，唔知係唔係因為佢冇愛情滋潤，所以搞到佢要利用運動嚟發洩，佢承認家自己已變成運動狂，每日冇運動不歡，佢話：「我每周做3 日重量訓練、另外3 日做有氧運動，1 日踏單車，一周7 天都沒有休息。」唔怪得之佢瘦到手筋腳筋，好似樹根咁凸晒出嚟啦！
