1.嫁入豪門做少奶奶係唔少女星嘅終極願望，李嘉欣、黎姿、徐子淇以及未入門先生仔嘅梁洛施呢啲成功例子，一再證明nothing is impossible。鑽石王老五數量有限，要mark最緊要快，呢方面「紫衫」出晒名進取，佢但凡去ball都着得好「行」，喺場內彩鳳咁巡來巡去搵目標，一睇啱就出擊。
試過有次，紫衫中一個總理，雖然唔係至top富豪，但漁翁撒網嘅紫衫自然唔放過機會，即刻上前傾偈坐埋隔籬，傾吓傾吓，紫衫不斷喺枱底用腳掃總理嘅小腿，撩來撩去挑逗佢，非常狼死，點知總理女友就喺附近，見男友俾人媾緊即刻發功，大庭廣眾對紫衫話：「你撩夠未呀？」紫衫惟有面懵懵借頭借路離席走人。
============================
2.某娛樂公司揸弗人「老豬」，每次出巡都有成隊保鑣護駕，佢除咗擔心自身安全，又要講氣勢。關仁八到佢出巡睇醫生時，次次都好大陣仗，要保鑣喺門口把守診所大門，搞到其他病人都受滋擾，怕鬼咗佢，以為診所有乜嘢大人物駕到咁巴閉。診所啲醫生同姑娘費事得罪老豬，所以佢嘅booking前後都盡量唔將病人排到咁密。關仁覺得病人喺醫生面前人人平等，唔應該因為佢係老豬就大晒。
============================
3.三色台近幾年不斷擴充版圖，旗下藝人經常要四出登台為三色台嘅節目宣傳。公司叫到，真係幾山卡罅嘅地方都要去。但有個三色台口痕友問媽咪姐，發唔發覺唔見「黑面神」去過台灣登台？
咦，諗落又好似係噃。口痕友話原來「黑面神」冧掂「陸二零」，攞咗個免死金牌，唔使去台灣。
唔係誇張，原來真係免死金牌㗎！事緣當年「黑面神」喺台灣踎墩，同「紅到凸」搭上，但又四處拈花惹草，俾「紅到凸」嘅老竇「紅雨」捉姦在牀。嘩，「紅雨」係乜嘢人大家都知，立即想打到「黑面神」殘廢，但「紅到凸」話晒一場相愛，幫「黑面神」求情。終於「紅雨」放「黑面神」一條生路，要佢即刻返香港，以後唔准再踏足台灣，唔係就打跛佢雙腳！
「黑面神」執番條命仔，真係驚俾人打跛腳，所以話就算有錢執都唔會再去台灣！
============================
4.媽咪姐嘅世侄女有個friend 係幫人修理電腦嘅，早兩日，世侄女拎部電腦去俾個friend 幫佢執吓啲零件，返嚟時同媽咪姐講話睇到啲正嘢。咦，咁盞，又有慾照？
世侄女話佢去到個friend 間舖時，個friend 啱啱開始整另外一部電腦，世侄女無聊走埋去睇佢個friend 點整之餘順便吹水，佢個friend 逐個「分純」打開嚟check 時，突然出現一批比四級冇格仔更激嘅相。世侄女睇到嘩嘩聲，因為相入面嘅動作有啲真係不堪入目，「女主角」就得一個，但男主角就黃、黑、白種都有。世侄女八卦，睇真啲，「嘩」咗一聲：「呢個女主角咪係『河馬』？」佢個friend 至唔多情願咁承認話部電腦真係「河馬」拎嚟修理嘅。世侄女話佢個friend 見到呢啲相都好無奈，為怕好似「猩猩王」單嘢咁惹上麻煩，惟有拿拿臨check 完即刻收埋部電腦，當無事發生，仲叫世侄女唔好同人講㖭。
媽咪姐聽完之後，好大感慨，發覺好多人仲未汲取到「猩猩王」單嘢嘅教訓，仲要將啲咁私人到唔見得光嘅嘢放上電腦，拎部電腦出街修理又唔先將所有資料清走；再嚟就係估唔到以「食餅」出身，同期中叫做最有實力嘅「河馬」原來咁世界大同。唉，媽咪姐又要對佢「另眼相看」嘞！
============================
有無人估到佢地係邊個呀
