任職動物訓練員的阿山，現時專責訓練和照顧小熊貓，能近距離和得意小熊貓玩耍，真係羡慕死人！
香港人真有福，能近距離看到國寶級動物，之前有熊貓、中華鱘，最近連小熊貓也登陸香港。看過小熊貓的人，無不大叫：「好得意！」小熊貓擁有棕黑色毛髮，喜歡爬樹兼「周圍拱」，憑着活潑可愛的形象，成功俘虜遊人的心。
動物訓練員阿山曾照顧過海豚、海獅、海豹、水瀨及大熊貓，現在更成為小熊貓的專屬訓練員，能跟得意到極的小熊貓日夜相對，更可觸摸牠們，係咪恨死隔籬？
自4 月30 號小熊貓搬入海洋公園的亞洲動物天地，正式開放給公眾參觀後，入場的觀眾，不論男女老少均發出類似的讚嘆：「嘩！小熊貓好得意呀！」像只有8 歲的Thomas 說：「佢哋啲毛色好靚，可以摸佢哋就好啦！」而20 出頭的劉小姐亦說：「嚟呢度其中一個主要目的係睇小熊貓，佢哋好活潑，好鍾意佢哋條尾擺嚟擺去，仲得意過大熊貓。」只要小熊貓現身，觀眾更禁不住瘋狂拍照，情況比謝安琪演唱會還要哄動。
柔柔
生物辨認是成為動物訓練員的基本條件，阿山話要靠特徵及性格來分辨小熊貓。小熊貓「柔柔」毛色較淺，體形較細，每次當阿山呼叫牠時，牠便會慢慢地走近阿山，非常嬌嗲。
泰山
泰山則鼻子及身體較長，身形大兼動作大，較有警戒心。
午飯引來哄動場面
每天下午，到31 歲的動物訓練員阿山出場時，情況更墟冚，謀殺更多「菲林」，皆因這時候是小熊貓的午飯時間。牠們每天會進食3 餐，竹葉是主要食糧，每頭小熊貓平均每日會吃3 至5 公斤竹葉及飲牛奶等。當阿山拿出竹葉時，小熊貓聰聰和粟子馬上活躍起來，而阿山更會把切粒的蘋果放到樹幹頂，聰聰和粟子看到後便奔往樹幹，急不及拿來吃。小熊貓進食的樣子的確可愛，連差不多跟牠們每天見面的阿山，也禁不住摸摸牠們的頭。
能照顧二級國寶小熊貓，皆因阿山有豐富照顧大型動物經驗。「我自細好鍾意動物，睇電視都會揀動物台，本身係游水教練，偶然見到海洋公園個網請動物訓練員，就諗不如試吓。我係02 年入職，最初照顧海豚，要落水同海豚玩，覺得好感動，係一個好新奇嘅經驗，因為從來未試過咁近距離見到海豚！同時佢都對我好好奇，不斷喺我身邊游嚟游去，留意我嘅動作。之後，我仲照顧過海獅、海豹、水瀨同大熊貓。」因為能近距離與各種大型動物相處，給予阿山新鮮感，為了學習與牠們相處，和訓練牠們，成了他工作的最大原動力，「佢哋會認得我，同佢哋相處會有互動，好有成功感。」
小熊貓極受遊客歡迎，在海洋公洋亞洲動物天地內，還有小熊貓公仔和遊人拍照。
辨認特徵觀察糞便
現時阿山專責照顧及訓練小熊貓，其實要做動物訓練員，學歷要求不高，中五即可，但首要條件是細心，還要懂得生物辨認。「我哋要照顧4 隻小熊貓，全部係上年6月同7 月出世，就嚟1 歲，我哋當初要分辨佢哋都有啲困難，要記清楚佢哋嘅特徵同性格，用心啲睇就會認到。好似聰聰同泰山係雄性，體形大啲，聰聰學嘢好快，對新事物好好奇；泰山冇咗左下犬齒。柔柔同栗子係雌性，體形會細啲，柔柔毛色淺啲，呈金啡色，個性溫柔嬌嗲，嗌佢會慢慢行近我哋；栗子毛髮深色啲，瞓覺時鍾意用條尾圍住個身保暖，睇落好似粒大栗子咁。」阿山笑說其實小熊貓的名字全根據其性格外形而命名，當初同事試過未能正確叫出小熊貓的名字，小熊貓會感到不滿，別過頭不理會他們。
每當下午，進行小熊貓餵食時，必吸引一大批遊客聚集，並拿起相機影個不停。阿山說：「我哋會畀小熊貓聽音樂，等佢哋習慣啲人聲，家咁多人對住佢哋影相，已經唔怕。」
不少人看到阿山能觸摸小熊貓，會非常羨慕，其實他除了餵飼外，還要做埋阿四，包括場地清潔、觀察牠們起居，定期向獸醫報告等。「我哋要小心觀察小熊貓嘅飲食、排泄物同體重，好似排泄物結實，代表佢哋腸胃健康。我哋仲要成日做場地清潔，呢個係照顧動物嘅基礎，直接影響動物嘅健康，每次清潔都差唔多成45 分鐘，特別係手腳靈活嘅小熊貓，好多窿窿隙隙都會有機會舔到，所以清潔要做得非常足。我哋唔使同小熊貓梳毛、沖澡、剪毛同趾甲等，但小熊貓1 年大約會換毛兩次，喺佢哋換毛時，要特別留意渠口有冇塞，多啲清理去水位。雖然做清潔會幾攰㗎，但由成team 人一齊做，唔覺特別辛苦。」
劉小姐說：「今日放假，專程嚟海洋公園睇小熊貓㗎，喺電視見到佢哋好活潑，現場睇仲得意，好鍾意佢哋條尾擺嚟擺去，得意過大熊貓。」
用蘋果吸引小熊貓
雖說阿山經驗豐富，但小熊貓始終是香港從未有過的動物，為了更好地照顧牠們，今年2 月阿山及同事曾遠赴四川取經。「熊貓嚟咗香港2 個月左右，但我哋之前已經見過面。我同3 個同事一齊去咗四川6 個禮拜，喺成都大熊貓繁育研究基地學照顧小熊貓。第一次入主場館同小熊貓做近距離接觸，我好緊張，亦係嗰時先知佢哋好鍾意食蘋果，當時我喺籠外望入去，以為得3 隻，點知一入到去，拎啲蘋果出嚟，就發現有成10 隻走出嚟，用後肢企起身，雙手遞高問我攞嘢食，個場面好震撼好難忘。」在四川時，約1 星期小熊貓們已開始能識別阿山的氣味，更會主動跟阿山玩耍，跟他四處走。
說到訓練，為了令天性膽小的小熊貓，習慣與人相處，阿山便想盡辦法，「好細嘅聲音都會令小熊貓受驚，佢哋受驚就會匿喺樹上或暗處。但有遊客就會有聲音，避唔到，為令佢哋習慣嘈雜環境同人聲，我哋有間房畀佢哋入去聽音樂，每日分段播1 至2 小時，每次約30 分鐘，由soft 到rock 都有，有時仲會開收音機畀佢哋聽。」經過為期約1 個月的音樂訓練後，現在小熊貓已習慣面對遊客，提起小熊貓的轉變，看見牠們能淡定面對觀眾，記者看見阿山禁不住的揚起嘴角，露出滿足的笑容。
小熊貓雖極愛吃蘋果，阿山有時會餵飼蘋果（右圖），但仍以竹葉為主要食糧，每次餵飼小熊貓時，必在後台，準備竹葉，後台閒人免進，包括記者在內。
小熊貓愛四處走捐窿捐隙，常周圍聞周圍舔，所以阿山清潔場地時，要非常細心，每次最少要花45 分鐘。
教小熊貓如小朋友
阿山曾當過游泳教練，他說訓練動物跟教導小朋友大同小異，主要是要給予清晰的信息及適當的獎賞。「為咗令訓練成效大啲，我哋冇分男女咁畀小熊貓試吓唔同嘅組合，要觀察佢哋邊個同邊個夾啲，夾啲嗰兩個會放埋一齊訓練，亦會用正面獎勵嘅方式去訓練佢哋，當佢哋行動正確嘅時候，我哋會吹一下哨子，然後畀嘢佢哋食，等佢哋習慣做得啱嘅時候會有獎勵，例如我哋會伸出手臂指向某個方向，訓練佢哋去特定地方食嘢，方便畀遊客近距離觀賞同影相。」
阿山笑指教小朋友時可以用言語溝通，但動物就要用身體語言表示善意，也要靠觀察行為了解牠們。早前發生熊貓安安咬人事件，但阿山說小熊貓性格膽小，不會主動攻擊人類，深信只要建立互信的關係，一定不會發生同類事件。「動物始終係動物，佢哋有襲擊人嘅可能，所以喺動物唔主動過嚟嗰時，最好唔好主動搞佢。所以我哋陪小熊貓玩，從來唔會迫佢哋，只會等佢哋主動過嚟，有時佢哋甚至會擺前腳喺我哋腳上，叫我哋同佢玩。同佢哋玩時，發現佢哋好興奮，覺得已經係最開心嗰時就要即刻停，等佢哋深刻的留低同我哋玩會好開心嘅印象，之後就會願意親近我哋。」
每提到小熊貓的生活小節，阿山總是滔滔不絕，關愛之情洋溢於臉上，這些關切之情像在訴說親人事情一樣。問他會否擔心小熊貓感染甲型H1N1 ？「唔會擔心，我哋做足清潔同消毒，佢哋唔會有事。家最緊要嘅事，係令佢哋習慣新環境，好好咁照顧佢哋。」
熊貓不是小熊貓
小熊貓是中國二級保護動物，原分布於不丹、中國、印度等地，因森林砍伐、過度獵殺作皮草及作寵物販賣，目前數量估計少於1 萬隻。小熊貓對溫度非常敏感，需生活在約17 至25 度的環境，無法忍受25 度以上天氣，由於牠們屬夜行性動物，活躍於晚間，所以在吃過午餐後，多會在石頭上午睡。
小熊貓雖與熊貓同名，但小熊貓絕不是年幼熊貓的意思，小熊貓屬小熊貓科，而熊貓的屬科一直備受爭議，爭論牠屬熊科或浣熊科，兩者共通點只是大家喜歡吃竹葉。小熊貓全身棕黑色，身長不包括尾巴只有50 至63 厘米，成年後體重也只有4 至6 公斤，遠看反而像一頭狐狸。
SPCA 公關及傳訊經理Rebecca
點做動物訓練員？
聘請動物訓練及護理員的公司不多，除海洋公園外，還有香港愛護動物協會(SPCA)和漁農自然護理署(AFCD )等機構。以海洋公園為例，每年會不定期招聘動物訓練學員，主要分海、陸兩項，例如陸項動物訓練員，會照顧所有陸地上的動物，期後更有機會接觸其他海洋動物。動物訓練學員學歷要求只需中五，人工跟市價差不多，亦會根據學歷不同而有所分別，大學畢業生起薪點約$12,000 ，而中學畢業生就約為$10,000 ，最好曾修讀生物科，要細心、有耐性及愛戶外工作。若有學歷及相關經驗，入職即可做動物訓練員。
香港愛護動物協會（SPCA ）公關及傳訊經理Rebecca 說，協會會定期招聘護理相關職位，如籠舍管理員、獸醫護士、美容師及狗隻行為培訓師等，「要入行做動物護理，唔算好難，但一定要有愛心，我哋面試時會要求應徵者分享下佢哋養動物嘅經驗。」
晉升階梯
動物訓練學員（約$10,000 起）＞助理訓練員（約$12,000 起）＞訓練員（約$14,000 起）＞高級訓練員（約$20,000 ）
後記：愛心爆棚
能近距離看到小熊貓，記者雖不是動物愛好者，第一個反應也一樣是大叫：「好得意呀！」心裏真的有點羨慕阿山，可以日日照顧牠們。但相見好，同住難，每天要為牠們的住處做清潔，盡心盡力照顧牠們，那種關心和動力，不是打份工咁簡單，少一點愛心一定辦不到！所以我都是選擇做觀眾，得閒叫聲好得意算了。
