因成員陳樂榣和甄穎珊整容，出道兩年多的Freeze 多番表示遭人白眼，但她們冇諗過上遊戲節目都遭受此對待，石詠莉向記者申訴：「我覺得好難堪！」
Freeze上周二（19 日）為《美女廚房》錄影*幾味，竟然*出火。方力申試食由她們炮製的鵝掌後大嗌：「好鹹！」估唔到Freeze 石詠莉向小方爆出一句：「咪似你囉！」矛頭直指形象健康的小方。
有人寸爆踩場，小方試食炸鮮奶時即罷食反擊：「唔食喇！啲奶假嘅！」
廚房開火，非同小可。事後小方承認「假奶言論」乃一時口快，望平息風波，但Freeze 認為他並非道歉。此外有工作人員更向本刊爆料，直指當晚在非錄影時段，梁漢文為了替小方出氣，竟雙眼厲住Freeze ，向小方細聲講：「喂！喂！有假胸睇呀！」當眾嘲弄三嬌人工身材。成員之一陳樂榣接受本刊訪問時表示，自己亦親耳聽到，並炮轟：「咁講完全係侮辱女人！」
Freeze 當晚合力炮製三道菜，最終成為全場最低分。事後陳樂榣（右一）說：「評分控制唔到，不過掟嘢就教壞小朋友！」
當日小方被寸「鹹」後立即黑面，並罷食及揶揄三嬌「假奶」反擊，離開錄影廠依然燶面示人。
最近有報道指方力申被17 歲美少女廚神Rainbow 餵食後對她嗒糖，更攞人電話邀約開P 。難怪他當日被石詠莉話「鹹」時會反應咁大。
本周一（25 日），記者向小方問及「假奶事件」，他連問題都唔聽就索性話：「冇乜好傾！」身旁梁漢文即替兄弟打圓場，「你哋（指記者）唔好咁啦！」
事件相隔多天後，Freeze 仍未能息怒，其中被寸到應嘅石詠莉只能用「無奈」兩字來形容此刻心情，她說：「雖然佢（方力申）事後喺報章補鑊，承認有失言，但呢啲唔係道歉囉，佢咁講係反擊我講佢鹹濕之嘛！我覺得好無奈，始終我哋係後輩！」
所謂「先撩者賤」，小方反擊其實亦情有可原。石詠莉解釋：「我唔知佢之前有呢類新聞，可能佢對號入座咗就嬲喇，我冇心挖苦佢，我當時已經補咗一句『好似你啲汗咁鹹』，而甄穎珊仲話：『好似你游水啲水咁鹹』，但佢依然好嬲。之後聽到佢話『假奶』，我就諗係咪已經得罪咗佢呢？」石詠莉自出道以來堅稱身材如假包換，「我都要顧及番我隊員嘅感受，佢咁講唔係咁君子，直頭人身攻擊。」
斥小方EQ 低
身材真被當假，石詠莉氣難下，可惜真正「打假波」，曾接受隆胸手術的甄穎珊，俾小方寸依然懵盛盛，她說：「我初時第一個反應係以為方力申話啲奶有三聚青氨。雖然人哋把口我控制唔到，但係佢應該冷靜啲，train 吓自己EQ 先啦！就算個胸係假，隆咗胸啲奶都唔會係假！」石插嘴：「希望TVB 唔好cut 咗嗰段，俾觀眾感受吓，評吓道理！」
冇諗過咁大件事！周一（25 日）梁炳再入廠為《美》錄影時，對「假奶事件」回應：「我都係搞吓氣氛啫，冇諗過咁大件事！你哋（指記者）有冇睇過我哋嘅節目㗎！一定會係咁㗎啦！」
掟嘢好玩，新奇又刺激！鄭中基否認為幫兄弟出氣而罷食掟碟，他說：「其實我唔食得奶，對奶敏感，我都唔係第一次掟嘢㗎啦，掟嘢好玩，新奇又刺激。」
乜佢哋同小方有結怨咩？監製錢國偉表示當晚已聞到火藥味，他反問記者：「乜佢哋（Freeze ）同小方有結怨嘅咩？不過我冇聽過佢哋投訴，投訴先算啦。」
Freeze 被三主持圍攻，當時評判之一周中師傅就睇唔過眼，幫口說：「我自己都好鹹㗎。」
梁炳為老友出氣
小方「假奶言論」甚具話題性，斷估TVB 會足本播放，不過梁漢文於鏡頭後的戲言，觀眾就無法回味。有工作人員踢爆當晚在非錄影時段，梁曾當眾嘲弄Freeze 假胸，「嗰時準備緊炸鮮奶環節，成班主持啲咪冇收音，梁炳嗰陣就用膊頭撞一撞小方，同佢細細聲講『喂！喂！有假胸睇！』兩個人望一望Freeze 之後就大笑！」為此陳樂榣亦向記者承認：「係有咁嘅事！冇諗過呢啲說話會出自佢把口，佢哋形象咁健康，應該收歛啲，咁講完全係侮辱女人！」此時石詠莉亦加把口：「有邊個男人唔鹹濕！我哋都係講吓笑，希望大家唔好咁敏感啦！」
小方迴避拒談
周二（25 日），梁漢文被問到私下曾就Freeze 人工身材而與小方細聲講大聲笑時，他反應甚大：「我冇講過，你哋唔好諗太多，我哋點解唔尊重佢哋！其實我哋都係想帶啲歡樂氣氛俾大家啫！」之後小方準備入廠拍《美女廚房》時，正當記者上前訪問時，他劈頭一句就話：「唔傾喇！都冇乜嘢傾，問親都係衰嘢！」似乎有人已向小方通水，在旁的梁炳見氣氛僵持，立即幫口說：「你唔答，咁咪得我一個講，其實我明白你哋嘅工作需要，但冇諗過會搞到咁大件事。」而小方此時亦主動搭一搭記者膊頭講「唔好意思」，之後就立即飛奔入廠。
中基怒掟炸奶
小方被笑「好鹹」，做兄弟的鄭中基當然不惜兩脇插刀幫老友。當日他就一手將Freeze 的炸鮮奶，猛力掟向牆上布景板。周一（25 日），鄭中基亦未有否認掟碟，「我都唔食得奶嘅，我對奶有敏感，啲奶好黐，所以咪掟囉，好玩吖嘛，新奇又刺激！我都唔係第一次掟嘢，之前Yumiko 都試過㗎啦！」本刊嘗試聯絡當日在場做評判的周中師傅及嘉賓Hotcha ，Hotcha 說：「佢哋（指主持）都係玩吓啫，可能想搞氣氛啦。」而周中則至截稿前仍未回覆。
被寸假奶後一日，石詠莉即在自己blog 內反擊，澄清自己身材堅過石堅之外，更暗寸方力申和鄭中基掟筷子掟碟幼稚。
喂！有假胸睇呀！
