近日《巾幗梟雄》成為全城熱話，觀眾紛紛激烈討論，連帶演員人氣亦隨之急升。據知下周劇情主線，是柴九（黎耀祥飾）與必文（敖嘉年飾）互相廝殺。先是必文在船上槍殺柴九至重傷，之後怒火未消的柴九再闖入蔣家誓殺必文，甚至其後鞭打必文，可謂劇力萬鈞。
本周二（第16 集），柴九被必文買兇謀殺，更被兇徒拋進大海。估唔到柴九大難不死。
必文恃住是蔣家長子嫡孫而做盡壞事，對柴九的仇恨日積月累，最終要自己出手殺對方洩憤。
5 月25 日第20 集
必文第一次買兇殺柴九不遂，心知大難不死的柴九會報仇，遂放風說會搭船離開無錫，實則穿定護甲護身，兼帶備火槍及刀，等候柴九上船。之後柴九果然上船兜心口插必文一刀，但反被必文開槍打中沉入水中，必文更跳入水與柴九搏鬥，務必要置他於死地，惟因自己不熟水性而最終未能成事。這場兩男互片的戲份張力十足，不可不看。
黎耀祥︰拍呢場同敖嘉年喺水底嘅戲，我哋兩個腰綁住鉛，兩隻手亦要揸住鉛，等一沉到落水底，即刻放開手上嘅鉛做戲，但又怕隨時唔夠氣，真係幾辛苦，等到拍完嗰場水底戲，成個人都軟晒。
敖嘉年︰我哋喺西貢海對開拍，嗰度都有成四米水深，有幾次我幾乎唞唔到氣，可能我冇祥仔咁大隻啦，拍完上嚟腳都震晒！
5 月26 日第21 集︰柴九四奶奶為必文翻臉
必文早有準備着定護甲，柴九懷疑四奶奶提醒必文，因而與她發生爭拗。柴九覷準時機，闖入蔣家準備槍殺必文，四奶奶因答應已逝的蔣老爺務必保住必文性命，出言阻止柴九，四奶奶當時說：「柴九，我唔想再見唔到你呀，殺咗人你呢世都會係殺人犯，要亡命天涯㗎！嗰次知你冇死到嗰陣，我嗰種失而復得嘅感覺，你知唔知道有幾咁開心呀？你呢槍打落去，我又變番得而復失，係好慘㗎！」柴九為之感動，終於放過必文。亦因為這段情深說話，暗示柴九與四奶奶微妙的男女之情。
鄧萃雯︰我同柴九嘅感情，雖然得嗰25 集，但已經唔係做戲，直情係有真感覺，就係因為個劇本寫得好，大家已變成劇中嗰個人啦！所以拍時我唔覺得自己係演緊戲，而係真正開始欣賞呢個男人！
5 月26 日第21 集︰三奶奶怒摑大奶奶
一向怕事的三奶奶（惠英紅飾）在大奶奶又一次加害其子必正（吳卓羲飾）後，怒不可竭地一巴摑向大奶奶，當時三奶奶激動說：「一向以來你穿紅我唔敢着綠，你行前我只敢行後，但你一次又一次加害我兩母子，我忍無可忍啦，我以前係做鏢師嘅，刀口上搵飯食，依家唔會再怕你，你試吓害我個仔吖，我一定唔止打，殺咗你我都敢呀！」惠英紅這場戲演來大快人心。而大奶奶謝雪心被摑後的感情變化，亦層次分明。
惠英紅
謝雪心
5 月26 日第21 集︰柴九鞭打必文洩憤
柴九四出找必文下落，見到祥發叔鬼鬼祟祟接濟必文，柴九即手持長鞭怒打必文，邊打邊說：「你唔好再害四奶奶呀，我俾面四奶奶至放過你狗命，你再害四奶奶，我乜都做得出！我冇四奶奶咁善良㗎！」對於這場鞭打戲份，敖嘉年說：「有幾鞭真係打到㗎！打落嚟嗰種感覺真係好痛，火辣辣咁痛，但反而可以令我更投入個角色，嗰排我見到祥仔真係驚驚哋㗎！亦好憎嗰個人，真正投入晒必文呢個角色！」
5 月28 日第23 集︰柴九摷屍堆救四奶奶
柴九與四奶奶因怕滿清秋後算帳而一同逃命，但中途失散，柴九回頭救四奶奶，在屍堆中狂摷，終於救到重傷的四奶奶，但卻因此染上咯血病（即肺癆病）。
黎耀祥表示：「摷屍堆嗰場戲，全部用真人扮死屍㗎，至少有百幾人，成條街都瞓滿真人扮嘅死屍。晏晝放飯時，淨係派飯盒都派唔少㗎！我演起上嚟份外有真實感。」
