[其他] 辦公室多Sex 事：地下情搞得有計劃

自從我同倪昇開始咗之後，喺公司我眼睛睇嘅嘢，變得好唔同咗；我開始留意其他女同事望倪昇時嘅眼神，以及倪昇望佢哋嘅神態，我並非想從中刮乜嘢秘密出嚟，但就係不由自主咁要望。
同時，對一啲早就傳出佢哋搞地下情、婚外情嘅男女同事，我開始留意佢哋喺Office 裏有無眉來眼去、偷望，甚至呢個打完短訊，另一個係咪手機就響起之類，我變得好敏感，可以話眼睛從未如此雪亮過。我甚至想起好耐以前，我同一個大我36 年嘅男人一齊，嗰陣時，逢係上街，我對迎面而來嘅「老人家」，總不期然望多幾眼，像要從呢啲陌生人身上，尋找跟那個他相似的地方。總之，呢一刻我係開心嘅，我唔再係嗰個俾生活磨蝕到無知無覺嘅我。

去邊度幽會好？
然後，我同倪昇遇到一個小問題，相信亦係所有關係唔見得光嘅男女會遇到嘅問題，就係去邊度幽會好？
倪昇並唔係去九龍塘嗰種Type ，我哋會去酒店，四星左右嗰種；雖然佢唔係乜嘢明星或名人，但係喺呢行中無人不曉，總之佢係一位公認嘅才子，所以我哋去酒店，一定係前後腳。我甚至提出，不如由我攞房，避免佢俾人認出。即使不見光，我卻從未如此開心過。
我同倪昇就係咁建立出一個Schedule 、一個System 。一切可以話Run 得好暢順，離唔開那個模式，我估其他搞緊地下情嘅男女，都應該係咁。總之，我覺得自己已經唔係細，而係一個Woman 了！