呂慧儀嘅性感謎女郎形象深入民心，喺新一輯《謎》度佢照舊以性感裝束上陣。
秋官、鬥雞呂慧儀再加上喬寶寶（中）嘅二撇雞蒙羅麗莎，相信必令觀眾笑破肚皮。
秋官扮奇洛李維斯，拗腰時卻不慎整傷。
無綫搜奇式節目《謎》又嚟啦！今次新一輯會喺呢個禮拜五緊接《掌故王》推出，主持大局嘅仍然係鄭少秋，佢嘅身份係特務001 （Adam 鄭），謎女郎呂慧儀繼續有得留低，至於上集嘅王貽興就被飛出局，換嚟飾演謎女王嘅羅蘭姐，仲加多個喬寶寶飾演嘅特務線人R 㖭。
《謎》每集都有扮嘢新驚喜，謎女王羅蘭姐抱住紙板狗，秋官着上蘇格蘭裙，簡直玩到癲。
呂慧儀和男友黃文迪前晚同場錄影《大咕窿》，表現避忌。
新一輯嘅《謎》開正秋官嗰瓣，因為每集都要扮嘢，令扮嘢秋又有機會顯本領；至於謎女郎呂慧儀梗係要性感，唔係咪浪費咗佢咁養眼嘅身材，所以佢嘅服裝唔係低胸就係露腿。其中一集喬寶寶就扮成二撇雞蒙羅麗莎，謎女王羅蘭姐就頭戴后冠，但最抵死嘅係佢啲寵物狗仔全部係紙製嘅。
秋官喺其中一場戲度，要扮成電影《22 世紀殺人網絡》中奇洛李維斯嘅造型，仲要慢動作拗腰。為咗方便拗腰，現場放咗張凳畀秋官頂住腰骨，點知秋官有個無線收音器綁喺腰度，佢一個大拗腰就俾個收音器頂傷腰骨。
from:
http://hk.apple.nextmedia ... coln_id=6802139
