好多香港手機鋪都擺滿晒A 貨iPhone 喺鋪面，最誇張係唔止機身似真貨，好多更連盒都抄足埋，係爭在未夠膽印埋Apple logo 上去啫！
早排東九龍電腦節，有部叫做「TiPhone 」嘅A 貨iPhone 勁多人買，誇張到幾度賣斷貨，仲引起埋香港Apple 嘅注意，開到聲話會跟進事件。
查實A 貨iPhone 又點會得一款，大陸前前後後出過超過30 款A 貨，流入香港後，先後攻入鴨寮街、先達，就連銅鑼灣、尖沙咀等購物區都賣到開巷，點只電腦節勁賣咁簡單！所以Apple 想禁晒啲A 貨嘅話，睇怕真係有排搞，祝佢好運！
鄧達明律師 似樣就告得
「一部手機嘅名稱、商標、外觀同介面，都有法律保護佢哋嘅專利，就算冒牌貨作出過改動，只要整體上有令人混淆嘅感覺，真機廠商都可以向海關投訴，或者民事控告冒牌貨廠商。至於件冒牌貨到底有冇侵權，就係由法官判定。」
真．iPhone 3G
A 貨3 級制
A貨iPhone 嘅size 有大有細，外形有扮iPhone 3G ，亦有啲仲扮緊2G 。但佢哋部部都係機面一個大芒，再加芒底一個圓形掣，整齊到好似同一個阿媽生一樣，唔同嘅可能只係機背，有啲冇咁似真iPhone ，有啲就連Apple logo 都印埋。行勻中港，可將佢哋嘅仿真度分成3 級，即刻晒冷畀你睇！
Ⅰ級 機背乜都冇
呢部叫ZoHo V80+嘅A 貨，機背黑乜都冇印，冇抄得咁離譜，所以最多香港手機鋪敢入貨賣，約售$880 。
Ⅱ級 iPhone 變TiPhone
之前大賣嘅TiPhone 就係呢級，機背同真iPhone 3G 一樣用上令面物料，但中間冇印Apple logo 。底部亦學足真貨印咗啲字同圖案上去，更印埋「16GB 」字樣，但部機只賣$880 ，實情冇16GB 記憶體，要加插microSDHC 先有咁多容量。
Ⅲ級 完全複製真貨
佢可以話係抄款機中嘅終極A 貨！無論尺吋、厚度、物料都同真iPhone 3G 有9 成9似，更印晒Apple logo 同「iPhone 」字樣，連底部嘅字同圖案亦同真貨一樣；再加埋有齊黑白兩色，而下面個盒都係複製真盒，有埋Apple logo ，扮到咁過分，所以只有大陸手機鋪先夠膽賣，賣700 人仔左右（約$795 ），香港冇人夠膽賣！
摔芒反應慢 A 貨都係用手指捽芒操控，但反應慢過真iPhone 好多，好似unlock 呢吓就要好慢咁掃，而且9 成9 嘅A 貨都冇multi-touch 。
核突A 介面 真係幾有心機抄iPhone 啲icon ，連底部4 個最常用程式icon 都學埋，但字體勁核突，一望就知係假！
誠實多條線 國產篤芒機常見嘅收筆位變成天線位，畀你拉出嚟收無線、亞視，間接提醒埋你佢係A 貨，好誠實！
A 貨扮唔到真貨賣
香港有得賣嘅A 貨iPhone ，無論叫乜名、外形仿真度有幾高，入面嘅功能都係差唔多，例牌大陸機雙咭雙待、電視接收、藍牙等，所以價錢嘅相差唔遠，都係$680至$880 左右，平嘅得2.4 吋芒，3.2 吋就貴少少！最好笑係佢哋全部用同一個介面，個介面已盡力模仿iPhone OS ，但始終扮唔足，所以連大陸都冇人會將A 貨當真iPhone 賣，更唔好話喺香港。
蘋果有葉 呢部mini 版iPhone ，機背又想印Apple logo ，但又怕死，於是喺蘋果上加塊葉，但律師話logo 好似都唔得㗎，咪咁天真啦！
串錯橙字 呢部叫HiPhone 嘅A 貨，包裝唔扮蘋果改扮橙，可惜將「iorange 」串錯做「iorgane 」，睇嚟A 貨商嘅英文水平仲係有待改善。
亂叫iPhone 有啲個樣根本完全唔係抄iPhone 嘅手機，無啦啦都喺機面印個「iPhone 」上去，唔通咁做真係會好賣啲？
騎呢！亂抄iPhone 事件簿
除咗上高嗰類咁認真模仿iPhone 嘅A 貨外，其實大陸仲有好多亂抄iPhone 嘅作品，超騎呢，登畀大家一齊笑吓，睇吓祖國科技幾出人意表！
魅族M8 個look 唔算極似iPhone ，但佢有埋multi-touch ，比其他A 貨煞食！
最有誠意 魅族M8
大陸PMP 牌子魅族，近年好受中港兩地用家歡迎，喺07 年iPhone 2G 面世後，佢着手開發iPhone A 貨，型號叫M8 ，直至今年2 月，部機終於推出。要搞咁耐，係因為佢用自己寫嘅介面，而PMP 功能亦比其他A 貨齊，整得好有誠意，所以大陸出機後試過有一大班人排隊買機。不過，部機賣成$2,999 ，香港人就唔肯畀呢個價去買大陸機，所以香港冇人入貨返嚟賣。
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
