冧女有一手的倪震有指仍與張茆有聯絡，更瞞住周慧敏認對方做契妹，以大哥哥身份呵護張茆，以防張爆大鑊。
偷啜海口索妹張茆後，倪震戲劇性地與周慧敏先分手後結婚。以為一紙婚書可以將自喻孔雀的倪震「收屏」，可惜周慧敏的「玉女箍」對他卻時靈時唔靈。
本刊收到消息，倪震表面上和張茆一刀兩斷，但二人原來私底下仍經常聯絡，以sms 傳情。近日將桌球室大搞的倪震，更瞞住周慧敏認張茆做契妹，暗渡陳倉，認親認戚，以防張茆發起茅上嚟，亂爆二人過往艷史。
上周五（10 日），被蒙在鼓裏的周慧敏，以女主人身份出席老公新開的桌球室，周圍騰招呼親朋戚友。有老婆免費做PR 嘅倪震，樂得輕鬆打波自娛。
想揞住我把口話咁易啦，契哥！（設計對白）
近日，張茆在自己blog 內貼出多張和朋友遊迪士尼公園的相片，其中一句「身邊的人變了，自己變了，感覺也變了，變得更幸福。」似乎若有所指。
4 月11 日巡視糖水舖
倪震近日積極銀，除緊張桌球室生意，周六（11 日）亦揸車到有份投資的小甜谷糖水舖視察，不過當日周慧敏並冇同行。
開幕當日，記者在倪震面前提及張茆時，倪震一直以「唔回應」迴避問題，但據知倪震和張茆由始至終都未斷纜。「阿Joe 出名識冧女，左右兩邊瞞佢最拿手，話咁快就番張茆啦。阿Joe 近排仲同我哋講，話自己搞緊桌球室，唔想有啲負面新聞出街，咪認咗張茆做契妹，等佢喺呢段時間唔會走出嚟亂噏嘢。」知情人士說。
4 月10 日波樓開幕
互啜做騷︰對桌球生意十分看緊的倪震，開幕當日當眾咀周慧敏，邀請唔同級數的嘉賓，旨在踩旺個場。
篤波自娛
有周慧敏自動波同嘉賓social ，倪震見有空檔，即埋枱篤波自娛。
免費PR
當日以女主人姿態出現的周慧敏，見王馨平唔識揸Q ，即細心教對方點玩。
當倪匡夫婦現身，周慧敏又識做地安排座位給兩老。呢個老婆認真娶得過。
老婆免費做PR
至於有老公萬事足的周慧敏，當日除set 行妝招呼親友外，兩公婆更即席上演互啜場面，引來在場人士起哄。而倪震當日所請的嘉賓，除鐵膽古巨基和倪匡夫婦外，稀客如狄波拉兩公婆、陶傑和王馨平等都有現身，相比結婚當日小貓三兩隻，場面熱鬧得多。
據知倪震這盤生意，自己只出「豉油」，幕後揸fit 人其實是皇雀會老細。「阿Joe一早同老闆傾掂數，拆帳同灣仔嗰間一樣。阿Joe 其實係掛名老闆，唔係出好多錢，之後賺到就抽佣，總之最緊要間中帶Vivian 上嚟打個轉做生招牌。老實講，平時要Vivian 出嚟做宣傳，收嘅錢好乸利，依家咪一家便宜兩家着囉！所以阿Joe更加要揞住張茆把口，你估佢唔驚Vivian 知㗎！」為強調老公今次冇問自己「度水」開舖，周慧敏多次表示：「呢間舖我冇份投資㗎，我打波都要自己俾錢。（倪震係咪修心養性搞生意？）佢做生意時都會修心養性。（聽講佢同張茆仲有聯絡？）無回應！（你完全信任倪震？）當然啦，我唔會去check 對方。」
張茆母親一聽倪震名字，即怒氣沖沖表示女兒沒有再與對方聯絡，與倪震劃清界線。
張母：倪震要負責任
翌日（11 日）倪震撇甩周慧敏，獨自駕車到大坑巡視有份投資的甜品舖「小甜谷」，更和友人在門外打牙骹。當發現有記者時，他即上車返回跑馬地金山花園。記者就倪震認張茆做契妹一事致電張茆母親，她劈頭一句：「我女兒沒有跟他聯絡！（佢哋上了契喎！）沒有這些事！（倪震向朋友講！）他自己說要自己負責任！」隨即匆匆掛線！
