電影被美國網站選為今年最期待電影。原因，唔關全智賢事，係原著動畫當年紅爆歐美㗎！
我今年30 ，個樣似40 ，心態似50 ，特別羨慕童顏，就算是沒有巨乳的。
像全智賢，28 歲都嚟緊，喺香港，一個唔好彩已經俾人標籤成中女。進軍荷李活，可以扮16 歲少女著水手服打殭屍，時光倒流到《我的野蠻女友》年代。
雖然，我堅持，真人版《血戰新世紀》（Blood:The Last Vampire ），應該搵萬綺雯做女主角小夜。
28 歲，著水手服，唔嚇人，外國人大概以為佢得16 。香港女星邊個有咁嘅能耐？張栢芝。
飾演殭屍領袖魅源嘅係小雪，自從拍過《最後武士》，被稱為國際巨星，好過淋浴巨星。
小夜嘅漫畫造型多咗乜？多咗露腿，全智賢似乎對自己對腳無乜信心。
長生不老你最近迷上徐淑敏同JJ cosplay 嘅《涼宮春日的憂鬱》？怪只怪TVB 無播過《血戰》（Blood +）。
2000年，《亞基拉》主動畫師北久保弘之拍攝了動畫《Blood:The Last Vampire 》，講長生不老半人半殭屍喜歡著水手裝拿住把武士刀去美軍基地斬殭屍，大紅，五年後，五十集外傳面世，大家幫女主角小夜找尋身世之謎。有乜咁好睇？主角啲血可以用嚟殺殭屍，然後長期喺人性同魔性之間掙扎，時空穿越兩次世界大戰同越戰，……夠豐富未？
點解我會知？我屋企有Animax 。
服裝設計有香港人份，攝影的潘恒生亦是香港的大師級，可惜演員陣容只有日韓。
中日韓兜亂日本動畫，咁快可以改編成西片，叻過《龍珠》。
多得香港人，出錢拍過《臥虎藏龍》、《色，戒》的江志強先生揀來這套殭屍故事，唔怕同乜乜《妖夜尋狼》類似。開初打算搵于仁泰執導，小夜版《白髮魔女傳》？轉吓轉吓，落入法國導演基斯拿漢手。其餘工作人員有大量亞洲班底，幕前全智賢鬥小雪，幕後元奎設計動作。《龍珠：全新進化》搵來濱崎步唱主題曲，《血戰新世紀》就有Glay 順便炮製入行十五周年紀念作。咁嘅陣容，最多投訴話自己唔係電車男的電車男都無得投訴啩！
佔戲頗重的艾莉遜米娜（Allison Miller ），扮演將軍個女，小夜老友，又喺《青春高校：回到十七歲》同Zac Elfon 做一對，上位中。
電影導演揀來基斯拿漢，貪佢熟手，曾經執導過李連杰的《猛龍戰警》，動作片港產片都無問題。
同一般漫畫相同，小夜得一套戰衣，全智賢除咗套水手服，有件白底，執到了。
