[資訊分享] 老板出通告減人工　有冇犯法？

市道不景，勞資雙方能夠合力共度時艱，算是不幸中之大幸。無奈有些僱主偏偏偷雞cut 人、放冇薪假，擅自改contract 。如讀者葉小姐的僱主，就在未經正式書面通知及要求員工簽同意書下，出通告減人工，僱主這樣做會不會觸犯勞工法例呢？葉小姐如不忿氣選擇辭職，有冇得賠遣散費呢？

辦公室ER ：
你好，本人在一間多媒體製作公司，任職網頁設計員約4 年。2 月尾某天早上返回公司，赫然見到告示板上貼出新通告：「金融海嘯令公司經營困難，迫不得已全體員工減薪15%，由09 年4 月1 日起生效，特此通知。」沒有任何書面通知員工或叫員工簽署同意文件，全體同事當然群情洶湧！我想請問公司是否已觸犯勞工法例？如果我們不接受這個減薪決定而辭職，老闆是否要賠足解僱補償給我們？請盡快解答，謝謝！
葉小姐上

雖然感受到葉小姐谷住一肚氣，無奈僱主以貼通告形式，通知僱員更改僱傭合約，基本上沒有抵觸勞工法例。街坊工友服務處張幹事解釋：「僱主更改僱傭合約內容，冇錯係必須得到僱員同意，但係未必要書面通知，亦唔使一定要僱員簽名，因為僱主可透過口頭通知僱員，或者根據事實狀況，即如葉小姐嘅情況，僱主只需喺辦公時間張貼通告喺公司當眼地方，注意法例並冇限定要喺辦公時間內貼幾多個鐘頭或者幾多日。而到咗生效日之後幾日，員工仍冇提出書面反對，原則上即係接受咗僱主更改僱傭合約嘅事實。」
主動辭職列明原因
雖然葉小姐可提出反對，但僱主仍可選擇減薪，葉小姐可以做的只有接受與不接受，若選擇不接受，根據勞工法例，葉小姐當作被遣散論，「此外，葉小姐亦可以主動向僱主遞辭職信，信上要講明係不滿公司單方面更改合約內容，所以才提出辭呈，僱主收到後，可以有一段合理時間（如7 日或1 個月內）作出考慮，推翻更改合約嘅決定，抑或接受葉小姐嘅辭呈。如果係後者，僱主就要按勞工法例作出充足解僱補償，如葉小姐做滿4 年(最少做滿2 年可獲遣散費)，最少可以得到7 天嘅代知通金，而遣散費就以葉小姐現時人工x2/3x 年資，假若月薪$12,000 ，即係可以攞到約$32,000 ，再加未放嘅有薪年假補錢等。」如果葉小姐及其他同事都反對公司決定，勞資雙方即使談判不果，張幹事建議可考慮進行工業行動，一齊罷工或按章工作，用群眾力量迫使公司收回成命。