舒淇與張艾嘉兩位金馬影后，昨日聚首為珠寶名牌Cartier 出席活動，張艾嘉大讚舒淇後生又靚女，笑謂拍攝宣傳照時有點緊張，幸好大會窩心為她執相除皺紋，而她拍攝時碰巧兒子Oscar 來探班，她便請兒子合照。舒淇則透露期待愛情的來臨，但要了解才會投入，絕不會一時衝動。
法國珠寶品牌Cartier 昨日在四季酒店，為經典系列Trinity 的新主題作品All about you forever 舉行活動，大會更邀請了兩位金馬影后張艾嘉及舒淇出席，各自佩戴200萬元新鑽飾亮相，上台分享早前為品牌拍攝宣傳硬照的喜與樂。
兩位金馬影后舒淇（左）及張艾嘉各有不同的美態。
張艾嘉情商探班的兒子Oscar 粉墨登場拍宣傳照。
Oscar 將讀大學
張艾嘉開玩笑說：「拍攝嗰時好緊張，舒淇又靚又後生，自己呢個年紀拍都有少少緊張，因為我個主題係真我，要簡單才真實，所以化妝都少啲，大會用高科技整走皺紋，I don\'t mind 。」張艾嘉拍攝時，其即將升讀大學的兒子Oscar 前來探班，她便請Oscar 粉墨登場拍下合照。舒淇在台上則透露其中一輯硬照，是以期待愛為主題，她說：「家都等待愛，對呢樣嘢都有憧憬，都有幻想愛情世界，要美好同簡單，除咗呢啲要大愛，好多人都等待愛心，不過目前為止都係朋友緊要啲，朋友係無限大，好包容，喺佢哋面前可以好烏歪。」問她會否與朋友轉化成愛人，她說：「大部份朋友都識咗7年以上，有啲都10幾年，大家了解好深，好難轉化做愛人，朋友係朋友。」
大會安排舒淇以指模作啟動儀式。
內地演員陳坤未有前來，他早前也為Cartier 拍攝宣傳硬照。
舒淇信一見鍾情
記者再問舒淇是否相信一見鍾情，她說：「信，不過未試過，家又唔係十幾、二十歲，兩個人一齊要互相了解，唔會一時衝動，不過家都未有呢個人。」早前馮小剛炮轟港人對他執導的《非誠勿擾》不識貨，身為該片女主角的她說：「個個地方文化背景唔同，《非》片喺香港冇乜宣傳，不過好多朋友都讚，不過可能好多人唔識欣賞內地式嘅幽默。」談到張國榮今日死忌，她說：「希望佢喺上面開開心心，一樣咁靚仔。」採訪：Law Wai Man 攝影：Dicky Chan
正等待新劇本的舒淇，現養尊處優，閒來出席品牌活動搵真銀。
http://appledaily.atnext. ... art_id=12588239
