白歆惠自己一個人舉案大嚼，初頭仲用匙羹嘆慢板，食相仲算斯文。
早個星期，媽咪姐踱入電視城，諗住喺CANTEEN 撞吓有冇老死嗲番兩句，點知一入到去，離遠見到有個女仔一個人喺度大啖大啖食嘢，嘩，邊個咁冇儀態㗎，遠睇面口幾生吓，行近啲一睇，啋，原來係台灣名模白歆惠嚟。咦，為乜佢會喺TVB 廳餐出現嘅？而且仲好似餓咗十年咁，狼吞虎嚥。
後尾見有個相熟PA 埋去同佢傾偈，媽咪姐立刻拉住PA 問個究竟，原來佢過嚟香港拍廣告，順便接受生活台訪問。哦，原來係咁，之不過點講佢依家都算係台灣掛頭牌嘅模界一姐嚟，但食相似足餓虎咁，以後就算幾靚幾性感都好，一諗起佢嘅食相，真係咩憧憬都冇晒。
後尾可能真係太餓，索性上演「餓娘傳說」，捧起個碗「直搗喉嚨」。
白歆惠曾經講過自己最值得自豪嘅就係「冇腩肉」；不過睇佢食相，恐怕「冇腩肉」日子會好快消失咯。
