
范冰冰雖然有近400 萬嘅卡地亞鑽飾照住,但點都唔及個蜂巢胳肋底搶眼,媽咪姐估計,佢可能係剃腋毛而引起皮膚敏感。
《第三屆亞洲電影大獎頒獎典禮》本周一(23 日)喺灣仔會展舉行,話晒係香港盛事,出席嘅嘉賓都悉心打扮。但世事嘅嘢,有時愈苦心經營就愈出事。
當晚數最肉酸都非范冰冰莫屬,佢雖然有近四百萬嘅卡地亞鑽飾贊助,襯埋條Guccitube dress 好似grand 到爆咁。點知佢行紅地氈時,懶靚咁用右手捉住裙腳擺甫士俾記者影相。嘩!佢一攤開隻手咋,個胳肋底好似蜂巢咁,毛孔又粗又多斑,見到都驚。
喺助手通知後,佢立即全程雙手下垂,仲一面尷尬。

身為主持嘅陳霽平,打扮大方得體,可惜條裙嘅胸口太緊,唧起啲肉,做成4 個波波嘅怪現象。
陳霽平4 個波
當晚擔任主持嘅陳霽平亦以tube dress 、大露背搶鏡,佢着得咁性感當然準備工夫做足啦,個胸箍到緊一緊,明明有好身材都箍到個胸移位,變咗四個波咁。

徐若瑄回眸一笑,百媚未生,反而個花背同條膠紙搶晒鏡。

相對之下,梁詠琪個背脊就白滑得多,可惜百密一疏,腰部露出一大笪濕疹,大煞風景。
徐若瑄、梁詠琪花花背脊
而同場嘅徐若瑄都係着tube dress ,佢着住條Valentino tube dress ,烏前烏後都無嘢睇,但係當佢擰轉身時,喔噢!原來佢條裙黐咗成條雙面膠紙,而且背脊仲一撻撻㖭。至於梁詠琪,本來個背脊都算白滑,但近腰部位就有一大笪濕疹,咁就趕晒客囉。