男仔隨街玩PSP 或NDS ，港女唔理三七廿一即刻話佢係電車男，港男勁無辜！
反而搭車玩iPhone games ，就有好多人讚你潮。如果你仲以為iPhone 只有低能game 就錯晒，不少著名遊戲廠商都加盟iPhone ，Square Enix 同Bandai Namco都先後喺iPhone 出game 。上星期Konami 更將PS3 大作《Metal Gear Solid 》移植iPhone ，重新打造為篤芒射擊遊戲《Metal Gear Solid Touch 》，仲成為AppStore 收費軟件第1 位。
以下介紹3 隻潮game ，全部加埋唔使$200 ，平過買一隻PSP game ！免費文章
Metal Gear Solid Touch
售價︰¥900 （約$72 ）
容量︰81MB
日本仲推出6 款《MGST 》iPhone 保護套，2G 同3G 都有份，每個賣¥4,500 （約$360 ）。
19 號凌晨推出，到當日下午1 點已經成為最多人畀錢買嘅iPhone game ！
有敵人出現，會圓圈表示，圓圈會慢慢變色，由黃變紅，代表敵人攻擊狀態，黃色代表未攻擊，紅色代表開槍中，玩家就要避。
閃避時代表無敵狀態，就算有直升機放導彈都打唔中你。
蛇叔冇手榴彈，想炸死一班敵人，只可以射爆汽油桶。
遇到射極唔死嘅敵人時，不妨放大瞄準轉用狙擊槍，咁就有機會一下射死！
潛入iPhone 篤芒開槍
全球累積銷量2,650 萬隻遊戲嘅《MGS 》，fans 數量全球第一。今次潛入iPhone都係搵番蛇叔做主角，不過玩法同以往潛入敵陣不同，變成第一身射擊，篤芒搵目標同篤芒開槍殺敵。最大特點係用埋multi-touch 功能，2 隻手指拉大立即zoomin 變遠程瞄準器，搵敵方目標最好。最難得連畫面都拍得住PS3 ，玩到血脈沸騰！
玩法方面，玩家喺遊戲就唔使行，亦唔需要潛行，玩家以主角Snake 第一身視點，篤實個芒搵目標，然後再篤就可以開槍射擊，乜都唔篤就可以搵掩護匿埋避子彈，操作簡單又易上手，而且玩落仲都有啲似街機體感射擊遊戲添！
呢幅奸角wallpaper 要5,000 DP 購買，大約打4 關就可以儲夠分買。
「SPECIAL 」模式內就可以睇番成個《MGS 》故事，有文字有插圖，當電子小說咁重溫晒咁成個故事架構。
迫你儲分買wallpaper
《MGST 》最吸引嘅地方就係潛入同埋做任務，iPhone 版都一樣有任務做，而且遊戲一共有12 項任務，清一色殺人，唔使偷偷摸摸，只要殺夠指定數目嘅敵人就過關！雖然任務不限時完成，但愈短時間完成及受到最少傷害就可以得到更高DP 分數。而累積到一定啲DP 之後，就可以返去主畫面嘅「DREBIN'S SHOP 」，購買各種《MGS 》插畫，用嚟做iPhone wallpaper ，fans 們咪錯過！
遊戲雜誌《Game Wave 》總監淙流：「iPhone 勝在有multi-touch 」
我都有留意到愈來愈多遊戲廠商開發iPhone 遊戲，除咗因為呢部手機多人用之外，佢嘅motion detection 同multi-touch 功能嘅可塑性高！就以《MGST 》為例，利用multi-touch 玩法感覺好新鮮，而且目前未有一部手提機可以玩到呢個功能先，iPhone 就係有呢個優勢！
目前《MGT 》只接受圖中所示7 個地區用戶購買，香港用家惟有取道日本iTunes Store 購買。
香港人買《MGST 》需經日本iTunes Store
有醒目讀者可能搵勻成個iTunes Store 都冇《MGST 》下載，其實《MGST 》暫時只有日本、北美及歐洲iTunes Store 可以購買。香港用家想買《MGST 》，除可去日本旅遊時買定張日本iTunes Card ，香港亦有部分店鋪如Mactivity 有少量發售，一張面值¥1,500 的iTunes Card 售港幣$180 ，用這張咭登記一個日本account ，就可以到日本iTunes Store 購買《MGST 》，扣除¥900 買game ，餘額仲可以買香港iTunes 都冇嘅日本歌添！
查詢︰Mactivity （3583 0621 ）
有片睇！
嫌圖片、文字介紹未夠詳盡？《Ketchup 》經已將Metal Gear Solid Touch 拍成短片免費畀你睇！請即click 入
http://www.ketchup.atnext.com就可以免費睇。
Final Fantasy Crystal Defenders
售價︰美金7.99 （約$62 ）
容量︰27.6MB
初期用到嘅職業只有黑魔法師、戰士、僧侶同弓箭手4 種，而白魔法師同盜賊呢2 個特殊職業，就要儲夠50G 先用到。
iPhone 冇掣唔緊要，呢隻game 整埋個virtual keyboard 畀你，操作同十字掣一樣咁方便。
保衛魔法水晶
雖然掛名為《Final Fantasy 》系列遊戲，不過《Final Fantasy CrystalDefenders 》就唔係傳統RPG 玩法，而係iPhone 上勁hit 嘅塔防遊戲，在一定時間內保衛水晶免被敵人搶去，比較用腦去玩，最適合搭車時慢慢思考防守戰略，感覺幾新鮮！
每一波攻擊前都可以睇到敵人屬性，等你可以部署相剋嘅職業，好似呢隻怪物就係物理攻擊無效，一定要用魔法先打得死。
戰鬥時玩家可以使用召喚獸，能一次過攻擊畫面上所有敵人，不過就會消耗5 個水晶。
只要篤一下人物就可以用金幣進行升級，而級數愈高就愈貴！
去到後期嘅地圖時，敵人會識得兵分兩路，玩家喺敵人路線上駐兵時要更加小心。
即時戰略feel
《Final Fantasy 》改用全新玩法，但就用番經典遊戲角色同世界觀，玩家開始遊戲之後就可以選擇地圖，而每個地圖最右邊都有一座水晶城堡，玩家嘅任務就係要喺地圖上部署唔同職業嘅角色，以阻擋由左邊出現嘅敵人搶走水晶！敵人會以固定路線前進，當遇到玩家嘅角色就會開始戰鬥，喺玩家消滅晒所有敵人之後，就可以得到金幣做獎勵，完成設定之後就會進入下一波攻擊，每一波攻擊嘅難度會慢慢遞增，直到城堡內20 個水晶被敵人搶走晒為止！
Tamagotchi Round The World
售價︰美金5.99 （約$46 ）
容量︰7.8MB
每完成一關之後，隻「他媽」都會畀個郵票你儲起，不過就唔同娛樂圈班集郵明星，「他媽」郵票只代表你嘅遊戲完成度。
雖然「他媽」唔識長大又冇得育成，但一樣要幫佢清理便便，又要用手指摸吓佢，氹到佢開心就有機會拎到得意郵票！
除咗要篤之外，有時亦要篤實畫面再捽，如果達成連鎖就可有更高分數。
他媽的應援團
曾經hit 到個個都要養一隻嘅電子寵物「他媽哥池」，嚟到iPhone 就唔玩飼養育成，改成考節奏感嘅音樂遊戲，玩家要跟拍子喺畫面又篤又捽，令隻「他媽」可以成功完成求雨舞就過關，玩法直頭同NDS 大熱嘅《應援團》一樣！不過遊戲嘅音樂就冇《應援團》啲J POP 咁正，只係用番Tamagotchi 嘅原創音樂，而且玩法亦冇《應援團》咁難，亦唔會搞到成個畫面都係拍子要你篤，輕輕鬆鬆就搞掂，女仔玩都唔怕搞到雞手鴨腳。
