滙控（005）供股，成為全城熱話，香港人至愛銀行搞到要向股東伸手，都係因為滙融拖累。噚日華華睇NOW 財經台，見佢哋訪問滙豐銀行前副總經理Edwin 劉智傑，話題離唔開滙控。Edwin 一向敢言，佢開晒名直指滙控前主席龐約翰改變咗公司過去嘅文化價值，跟咗美國嗰套，只追求短線利益。仲話家陣分拆上海滙豐銀行出嚟可能係唯一嘅出路，對股東最好。華華睇完個訪問，即刻打電話問Edwin ，佢話龐約翰令滙控變成美式文化，以賺錢為先。仲爆滙控曾經對一個貸款人，一年加3次息，佢冇講詳情，只係話滙控家陣嘅管理有問題，始終以前嘅英式管理有人情味啲。至於點解突然出嚟講滙控，Edwin 話希望提醒股東，唔可以盲目以為供咗股，股價就會升番上去，股東要睇埋公司嘅管理文化。
睇淡股價沽清光
劉智傑：跟埋美國佬，掛住向錢看。（設計對白）
佢又話自己唔係因為離開後唔開心至出嚟講嘢，佢建議股東唔好加碼供股，最好沽正股去供股。至於佢之前亦揸住滙控，不過2000年底離開後就一路沽，家陣已經冇貨喺手。對於滙控「變咗」，其實唔少老臣子都有開聲，好似之前滙豐前亞太區主席艾爾敦就話，滙控錯在冇將管理文化帶入美國滙融，但佢係傳統gentleman ，冇開名批評。李華華mailto
iWaWa@AppleDaily.com
龐約翰：你話我呀？（設計對白）
from
http://appledaily.atnext. ... art_id=12544159
