大哥我很喜歡你！真實對白
發離婚聲明，哈林心情當然躁爆，不過藍莓挑通眼眉喎，無啦啦捉住哈林話：「我很喜歡你呀！」之後又成份撲落哈林度合照，連哈林都忍唔住打個突！
哈林（庚澄慶）老婆伊能靜上年11 月被踢爆同內地歌手黃維德北京拖手，兩公婆拖拉近4 個月，上週五（20 日）終於同日各自發出離婚聲明。
搞離婚心情梗係差爆，但上星期47 歲哈林仍幫無綫到韓國拍攝《耳分高下》終極篇外景，雖然中年失婚兼帶住個仔，但話晒係台灣主持一哥，才財兼備唔使懷疑，8位天使妹嗒晒糖，來自福建的藍莓（劉俐）更十成功力狂電哈林，時下港男個個變電車，難得大哥有車有樓，藍莓梗要飛身擒搶，唔係點學人做港女呀！
Cool 爆回台北
哈林上週六（21 日）發出離婚聲明後，即吸引大批台灣傳媒於機場等哈林，不過哈林心情差爆乜都唔答，其間有台灣傳媒跌倒，哈林都淨係講句：「你擋到我的路！」cool 到爆。台灣《蘋果日報》圖片
今年19 歲嘅劉小姐來自中國福建，都係講國語，同聲同氣易溝通，大哥諗得過喎。
去年11 月哈林老婆伊能靜被拍到與大陸歌手黃維德於北京煙韌拖手，哈林對太太艷史一直封口，直至上週五（20 日），雙方終於發出離婚聲明，兒子撫養權及身家分配則未有交代。
早於發離婚聲明前4 日（16 日），鄧健泓、森美、官恩娜、黃德斌等人出發到韓國拍攝《耳分高下》外景，而哈林為度掂稍後發出的離婚聲明，延遲至18 日才從台灣飛到韓國會合大隊，哈林助手卻表示：「因為大哥（哈林）工作太忙，所以才遲來韓國。」據知正為離婚一事煩到死的哈林，本來想推卻今次外景拍攝，不過贊助商康泰旅遊指明要哈林撐場，哈林才頂硬上赴韓開工，難怪連日來，如非必拍內容，哈林都例牌自閉酒店房內，連成班工作人員出外食飯都唔蒲頭，實行自閉避靜。
冰山溶雪
之後成班天使玩掟雪球，藍莓（左一）又個個唔掟淨係搵哈林埋手，成功令哈林開懷大笑反擊，有機阿女。
自動追蹤
哈林未埋位，藍莓全程好似GPS 咁到哈林實一實。
怕吹甩鼻
去到雪山見到清理旅客身上雪塊嘅噴槍，貪玩嘅Sing 之天使雪梨（Coffee ）（右圖）即時噴面扮醜婦娛賓，嫌疑整過容藍莓有樣學樣，不過就作狀噴頭髮，身後嘅鄧健泓玩嘢：「係咪怕吹甩個鼻呀！」
藍莓出手
心情差，但哈林開工一樣要笑口噬噬，當知道有記者飛抵探班，即要求工作人員將外景場地之一的泳池玻璃遮上布，一反對傳媒的友善態度。不過天使妹之一嘅藍莓劉俐醒目聞到唔妥，到20 日（週五）於龍平滑雪場時，更主動以國語上前要求同哈林合照說：「大哥，我很喜歡你，可以跟你合照嗎？」二話不說就挨實哈林膊頭，個樣仲要鬼咁冧，哈林大哥離婚唔使愁喎，中年男人有啲滄桑感仲煞食呀！
各自發離婚聲明
喺台灣三立電視台播出的《王牌大賤諜》專講藝人情史，亦有台灣奀星爆老婆勾佬情史，內容夠爆所以收視一直高企。
台灣節目爆離婚主因
去年11 月伊能靜與黃維德北京拖手新聞刊出後，在台灣音樂人黃國倫主持嘅《王牌大賤諜》節目中，即大爆哈林因為家底好，庾媽張正芬係國劇名伶，庾爸則為台灣政治人物，伊能靜則普通家庭出身，所以雖然伊能靜係哈林初戀，不過庚母並不支持，直至伊能靜在台灣紅咗，00 年跟哈林於美國結婚，02 年誕下小哈林（庚翰睿），不過始終庚家思想傳統，伊能靜仍未得到奶奶認同。不過台灣節目一向噏完唔使負責，信唔信自己諗。
Ella 入韓bra
金融海嘯、韓圜大縮水，難得到韓國拍外景，官恩娜明知有記者跟住都走去揀bra，問佢做乜唔試埋，佢就話：「嘩，驚俾你哋影呀！」不過見佢醒目拎起件C cup內衣摸吓質地，平時又唔覺娜姐身材咁驕人喎！
邊個放屁？好臭！
Sorry ，我食咗kimchi 。
檸檬放屁
去到韓國班天使妹日日食辣，未必個個頂得住，上星期四成班天使喺酒店房等開工，忽然成班天使掩住個鼻奪命狂奔，之後檸檬（李婷）先好咁話：「Sorry ，我食得太多泡菜呀！下次最多忍住先！」
衛生巾3,000 韓圜（約20 港元）
水蜜桃買M 巾
女仔去旅行最怕月事到，Sing 之天使水蜜桃陳艾壎，因為唔方便急急去便利店撲M 巾，好在有班天使姊妹單擋先冇咁尷尬。
