孫佳君掃貨正興高彩烈之際，忽然發現有記者影相。
唔知大家有冇留意到，今個月初嘅一則法庭消息，指一個叫「孫佳君」嘅女人，俾富商毆打。
正當媽咪姐因為呢單新聞而喚起對當年艷名遠播嘅孫佳君嘅記憶時，咁岩得咁蹺，記者就撞到佢單拖喺中環IFC shopping 。當時情況睇，孫佳君心情甚佳，shopping 興致不減。不過，當佢發現記者後，立刻開車走人，由中環一路駛到香港仔，唔係食魚蛋粉，而係入咗香港仔警署，逗留咗成半粒鐘至走。記者趁機上前問佢入警署做乜？但佢封口唔答，風馳電掣咁開車賣甩咗記者。到底佢係為毆打案入警署提供資料？定係為咗避記者？點都好啦，睇佢外表就好似冇事一樣囉。人哋話晒都經歷過大風浪嘛！
明知有記者跟住，孫佳君將車駛進香港仔警署，逗留咗半粒鐘。離開警署時，孫佳君（右圖）雖然笑笑口，但對記者提問一概唔答。
3 月7 日嘅《蘋果日報》法庭版報道咗孫佳君被商人毆打的案件開審。
