黎明、甄子丹和謝霆鋒等主要演員，昨日出席新戲《十月圍城》於香港國際影視展舉行的發佈會，吸引大批傳媒到場，分批接受中外記者訪問。不過黎明疑因受近日旗下歌手衞詩的涉藏毒負面新聞影響而未有接受訪問，謝霆鋒則透露栢芝寧可陪Lucas 都不願復出拍戲。
黎明、任達華、胡軍、梁家輝和曾志偉五大影帝，加上甄子丹、謝霆鋒和范冰冰等一眾演員，昨日齊集會展，出席電影《十月圍城》發佈會，吸引200中外傳媒到場採訪。陳德森導演、陳可辛監製的《十》片將於4月開拍，講述國父孫中山1905年間在港逃避清廷暗殺的故事，電影公司又在上海耗資4,000多萬搭建舊中環的場景。
霆鋒爆栢芝黐仔
黎明和范冰冰在台上言談甚歡，其中范冰冰更說到指手劃腳。
一眾演員於台上分別介紹自己的角色，黎明將會飾演一名乞丐，但未知是否因衞詩近日的負面新聞影響，雖然於台上談笑風生，但黎明事後未有出席中外傳媒訪問。他於台上以國語說：「作為一個演員，拍自己從來沒演過的角色是新鮮也是很大挑戰，相信觀眾有同感，一個月不洗澡也不是問題。」霆鋒於片中將飾演毀容的人力車伕，他接受訪問時提到自己將首次剃光頭演出，他說：「我做一個好忠心嘅儍仔，老闆叫我死就死、打就打。」問到可擔心Lucas 不認得剃頭後的他時，他說：「我前幾日剪髮佢都陪埋我一齊剪咗，家剪到好似我咁，唔再係冬菇頭。」提到太太栢芝是否打算復出拍戲時，霆鋒說：「我冇理呢啲，佢離唔開個仔之嘛，我冇所謂。佢淨係問我如果拍戲可唔可以帶埋個仔，我話唔畀，片場又唔係咁乾淨，演員又易分心，百害而無一利。我完全唔贊成，佢（栢芝）就話咁老公你辛苦啲啦。」飾演賭徒的甄子丹自言本身不賭錢，他說：「本來叫老婆去澳門玩幾日順便實習，但係志偉就叫我同佢賭，咁咪即係送錢畀佢使。」問到早前拍《江山美人》時與黎明曾傳不和，他說：「上次試位整到佢手指都係意外，其實冇嘢，我同Leon 好好朋友，頭先仲傾話佢搬咗入元朗好好住，叫我得閒入去飲兩杯。」
左起：胡軍、謝霆鋒和任達華出席新戲記者會，戴上黑超的霆鋒比兩位前輩更添星味。
左起：曾志偉、甄子丹及梁家輝三位演得之人將在《十月圍城》中大鬥演技。
孫中山一角保密
《十》片中雲集多位影帝，不過昨日卻未有公佈關鍵角色孫中山由誰擔綱，曾有傳國父一角將由發哥演出，不過導演、監製昨日一同封口，陳可辛說：「呢啲嘢點講得你哋聽呀？總之個演員一定要有份量，要觀眾覺得其他演員為佢死係值得，所以唔係形象似就夠。」不過據知孫中山一角不會找知名演員演出，在戲中只會以背影來交代。採訪：藍文浩 攝影：葉君海
范冰冰穿上低胸晚裝襯名貴鑽飾亮相，艷光四射謀殺不少菲林。
http://appledaily.atnext. ... art_id=12528455
