林志玲不收分文做阿哥生招牌，林志玲更嗱晒全副身家出嚟投資化妝品生意，可惜林志鴻經營不善，去年已經蝕咗2,000 萬台幣，相等於450 萬港元。
由林志玲阿哥林志鴻代理嘅德國化妝品牌ARTDECO ，近月屢傳生意告急，更有前員工向記者爆料，公司喺舊年蝕咗起碼2,000 萬台幣，但身為總經理嘅林志鴻依然懶懶閒，返工例遲、開會失蹤，最近仲逼員工減薪，事件最後鬧上勞工處。
身為品牌代言兼幕後「科水」大老闆嘅林志玲，除咗努力撲水幫公司止血，更有傳父母逼佢盡快嫁俾「馬桶太子爺」邱士楷，靠親家嘅財力，幫林志鴻渡過生意難關。
只要林志玲人在台灣，就會拖實阿哥四出幫品牌做宣傳，林志玲更因為親自設計限量版化妝盒，令生意額急升。
06 年
3年前，林志玲經阿哥介紹，成為ARTDECO 代言人，更舉行大型簽約儀式，但三個月後，代理公司突然倒閉，林志鴻決定接手做代理，估唔到蝕晒細妹啲血汗錢。
誤打誤撞
林志玲無端端做老闆，其實多得阿哥林志鴻遇人不淑有關。
喺○六年，幫老豆打理鋁業生意嘅林志鴻，認識當時代理德國化妝品牌ARTDECO 嘅姓鄔商人，對方開出1,000 萬台幣（約225 萬港元）酬勞，誠邀林志玲擔任品牌代言，林志鴻於是飾演中間人角色，幫細妹接咗呢單「筍job 」。
點知代言唔夠三個月，代理公司突然倒閉，鄔姓商人更人間蒸發，林志玲嘅代言費亦只收到「上期」，尾數當然凍過水。
雖然運滯，但林志鴻覺得化妝品市場其實「錢」途無限，於是決定接手代理ARTDECO 。
全個化妝品系列，都由林志玲做代言，但近排生意唔好，就算有第一名模坐鎮，都要大減價促銷。
專櫃執笠
重新同德國總公司傾好代理權，林志玲更嗱出幾乎全副身家，投資5,000 萬台幣（約1,125 萬港元）俾阿哥做老闆，自己就一個仙都唔收做代言人。
經過林志鴻整頓公司生意模式，○七年將品牌重新推出市面，加上細妹落力幫手宣傳，生意額隨即起死回生，但踏入○八年，喺金融海嘯影響下，情況明顯逆轉。舊年八月，位於忠孝東路SOGO 嘅專櫃，因生意額未達標，而被拒續租要搬走；今個月，位於台中嘅專櫃，亦因為無人幫襯要馬上離場，令全台灣嘅化妝品專櫃，執剩八間。
林志鴻身後位於SOGO 嘅化妝品專櫃，高峰期每月200 萬台幣生意額，直到舊年八月被逼遷，生意額跌到30 萬都無。
入不敷支
生意唔掂，有前員工爆料話，全因為總經理林志鴻無好好睇實盤生意有關。
「林志鴻不會天天到公司，和公司同事開會，也是姍姍來遲……他常待在辦公室裡不出來，會議也不參加，公司很多決策無法決議和執行。」
返工遲到早退，生意額更蝕到入肉。「近一年來公司嚴重虧損，每月所有專櫃營業額加起來不到100 萬，但薪金成本每月就逾100 萬，還要付百貨公司的抽成（即佣金，約三成）、進貨成本、代理費用，還有宣傳活動，根本入不敷支，目前公司最少賠了2,000 多萬。」
3 月5 日
位於台中中友百貨嘅專櫃，同樣因為業績欠佳被逼遷，3 月5 日做埋最後一日生意，兩日後被李英愛代言嘅韓國品牌取替。
3 月7 日
員工撐志玲
為咗減省開支，林志鴻近月向員工「開刀」，減人工之餘，仲減埋佣金，就連出糧日期都由月頭改到月中，員工忍無可忍，集體去勞工處投訴，但林志鴻未有現身勞資會議，完全無誠意解決問題。
「林志玲只是掛名老闆，但每次都陪哥哥出席宣傳活動，也會到公司和我們開會，出很多主意，林媽媽也幫忙辦美容講座，林家一家老小在努力，林志鴻的表現就差多了，我們都很為林志玲抱不平。」
打死不離親兄妹，林志玲當然唔會袖手旁觀，早排有傳佢會「速嫁」馬桶太子爺邱士楷，希望幫到阿哥盤生意，奈何邱公子想過多幾年單身生活。闊太美夢延期，至於稍後要同周杰倫合作拍電影《刺陵》嘅林志玲，500 萬台幣（約112 萬港元）片酬，唯有奉獻晒出嚟幫公司止血。
因為屋企人背景問題，令林志玲苦無辦法打入大陸市場，咁耐以嚟，只有呢個大陸女裝鞋廣告代言在手。
為咗個女嘅前途，林爸媽林繁男同吳慈美，已絕
一切「顏色」活動，但林志玲依然被列入敏感名單。
無緣賺人仔
舊年，林志玲以7,000 萬台幣（約1,580 萬港元）收入，榮登模界吸金榜number one ，但以佢嘅知名度，其實有本事更上一層樓，但奈何屋企嘅「綠色」標籤，令佢失去唔少賺錢機會。
早在06 年，事業剛起步嘅林志玲，獲中央電視台邀請主持中秋節晚會司儀，但因為父親林繁男曾公開挺陳水扁、阿媽吳慈美又係民進黨「水噹噹姊妹聯盟」理事長，綠到不能再綠，國家廣電總局拒出批文俾林志玲，最後益咗侯佩岑執二攤。
直到舊年，林志玲憑《赤壁》人氣再急升，加上老豆封晒口，阿媽又辭退唔做理事長，中央電視台再次申請林志玲做中秋晚會司儀，可惜因為爆出陳水扁「洗錢案」醜聞，令林志玲再度落選，由吳佩慈頂上。
為咗淡化「綠色」，出名高EQ 嘅林志玲除咗拒談政治，更強調「我不是綠也不是藍色，我是彩色的。」答得大方得體，但並無助林志玲賺人仔嘅機會，唔怪得成日傳佢要嫁人，搵條大水喉養起一家四口啦！
