韓君婷97年當選亞姐至今，出道12年一直星運浮沉，反而憑40吋巨躉被封籮霸，肥瘦無常的幻變身形也屢成焦點。踏入中女階段仍半紅不黑，32歲的韓君婷決定豁出去加入整形兵團，收取100萬酬勞擔任隆胸代言人，本月底她會在港接受隆胸手術，在體內注射透明玻璃質酸谷胸升cup ，博成話題女星翻身。
韓君婷當選亞姐後曾數度暴肥，雖擁36C 豐滿上圍，但其40吋下圍更突出，因而被封娛樂圈籮霸，當時她曾表示對巨躉及圓潤身形屢成話題感難過，結果做完纖體代言人後還瘋狂節食，搞到減肥過龍變成體重僅得90磅的火柴人。雖然近年韓君婷已稍為長肉，但依然偏瘦，昔日豐乳巨臀不再，沒想到她近日已落實擔任隆胸代言人，在身形上再創話題。
《前日身材平板》韓君婷前日在跑馬地睇化妝品，身形瘦削的她線條已不復當年。
選購健康食品時，明顯可見韓君婷雙臂瘦如藤條。
百萬酬勞「同普通人整牙咁」
《01年豐乳肥臀》韓君婷01年以水着look 在日本拍《獎門人》外景時，因身形圓潤被封籮霸，當時其上圍也十分有料到。
身材無復當年勇的韓君婷，前日偕女友人現身跑馬地購買健康食品及蔬果時，穿外套及短褲的她瘦削身形一覽無遺，胸部更毫無睇頭。身形反覆又星運浮沉，32歲的韓君婷決定豁出去博一鋪，收取約100萬酬勞接受無創隆胸，為蕭定一旗下的美容公司擔任隆胸代言人，為期兩年。據悉，韓君婷本月底舉行記者會公佈詳情後，即會在港接受隆胸手術，注射透明玻璃質酸將33A 上圍谷至33C 。昨日記者致電韓君婷求證時，她承認會擔任隆胸代言人，她說：「今次做呢樣嘢最主要唔係永世，唔係喺身體裝咗嘢之後攞唔番出嚟，其實家呢啲嘢都好普通，同普通人整牙咁上下，唔需要唔認，而且酬勞又好。」她又謂近年變瘦後胸骨顯現，但無意將胸部隆得太大，她說：「當我A Cup 嘅話，會變咗A+或者B 咁啦，但都要見咗醫生先知。個手術都係打針啫，過幾個月就會冇咗，唔再需要嘅話，到時又可以平凡開心生活。」韓君婷隆胸後必成城中話題，問她是否希望有助星途？她說：「好難講，我諗好壞嘅迴響都會有，好在乎noise 係點，實有人抗拒，我有心理準備㗎啦，雖然到時又會focus 我嘅身材，但你有你望，你有你幻想，起碼我收咗錢先。」娛樂圈弱肉強食，韓君婷不諱言道：「逆境生存只可以強，跌低唔緊要，要企番起身，同埋人哋係會知道你做緊乜嘢。」
局部麻醉注射透明玻璃質酸
蕭定一（右）曾邀吳文忻擔任整形代言人，接受削鼻骨手術及打botox 。資料圖片
蕭定一年前已邀港姐吳文忻和落選亞姐甄穎珊擔任整形及隆胸代言人，今次又傾掂韓君婷隆胸，他昨日在電話中說：「我好開心可以搵到韓君婷做代言人，因為人選真係好難搵，今次有新科技，係一種隆胸嘅新概念。佢話自己冇以前咁大（指胸部），個shape 靚啲冇人唔鍾意，又有錢收，有乜嘢好過咁。」至於整形外科專科醫生林竹筠昨日接受本報查詢時，表示無創隆胸是於乳腺位置注射透明玻璃質酸（Hyaluronic acid ），以往是用作隆鼻及隆下巴之用，現已發展到用作體形塑造，但粒子較大，注射後可維持9個月，之後會在體內慢慢流失。隆胸者接受注射時，需進行睡眠或局部麻醉，整個過程約1小時，即時見效。採訪：丁寧攝影：娛樂突發組
娛樂資料庫：暴肥暴瘦無所適從
韓君婷由97年參選亞姐開始，體形變幻莫測，時肥時瘦，但年前患上厭食症變火柴人後，身材始終無法重回巔峯。資料來源：《蘋果》資料室
《06年》患上厭食症的韓君婷，穿上長袖衫褲遮掩火柴人身形。
《04年》一度收身的韓君婷體重反彈，肥腫難分。
《03年》獲邀擔任纖體代言人，身材可算是入行後最fit 最均勻。
《02年》跳槽無綫的韓君婷，被拍到穿三點式到海灘曬太陽，肥腩龍躉盡現。
《00年》加盟亞視當演員後，身材比較纖瘦，有前有後。
《97年》參選亞姐時期明顯baby fat ，麒麟臂及水桶腰通通有齊。
《02年小巧苗條》時肥時瘦的韓君婷，02年擔任纖體代言人時雖然胸部不大，但身形fit 到漏油，沒想到如今竟會接受隆胸手術。
