上月底在日本涉嫌藏毒被捕的衞詩和關楚耀，經驗尿後被證實體內含有大麻及別的「東西」，令衞詩所屬的Amusic 唱片公司老闆黎明極度憤怒。據悉Amusic 今日決定與衞詩解約，將她逐出娛圈，同時為免衞詩影響孿生胞姊衞蘭的事業發展，而要求她搬竇與衞蘭分居，加上不會放棄關楚耀的環球唱片公司誓將棒打鴛鴦，令衞詩頓成失業、失戀和失竇的三失青年。
衞詩和關楚耀上月底在日本涉嫌藏毒被捕，前日二人被證實驗出曾服食大麻及體內尚有別的「東西」，今日衞詩所屬的Amusic 唱片公司會進一步公佈有關消息，屆時衞詩體內的「東西」是甚麼便會揭盅，加上她被證實吸毒，故唱片公司會一如之前決定，跟衞詩終止合約，將她逐出娛樂圈。Amusic 發言人沈小姐昨日表示，今日向日本的律師查詢最新資料後才會發放消息，但不會舉行記者會。
棄詩保蘭 要求姊妹分開住
據悉，衞詩自甘墮落沉淪毒海一事，令Amusic 老闆黎明極度震怒，除跟衞詩解約外，更決定「棄詩保蘭」，為免衞詩日後返港會影響其孖生家姐衞蘭的事業發展，將要求兩姊妹分家，要求衞詩搬離與衞蘭同住的大埔道郝德傑山寓所另覓新居所。除此之外，由於關楚耀所屬的環球唱片公司雖未決定徹底放棄他，但肯定會棒打鴛鴦，要求關楚耀跟衞詩分手，令衞詩一下子失業、失戀和失居所，為吸毒付出沉重代價。對於要求衞蘭和衞詩分家一事，發言人沈小姐說：「真係未知佢哋會唔會分家，始終係佢哋家事，唱片公司只會畀意見，但都唔係呢一刻，處理咗現有問題先，等有消息衞詩返嚟，到時至再同衞蘭傾。」相比起衞詩，關楚耀的前景似乎樂觀得多，他所屬的環球唱片公司負責人黃劍濤昨在電話中說：「雖然今日會出更詳細嘅驗尿報告，但無論係點，我都要等佢返香港，同佢面對面傾一次之後，先會決定點樣去處罰佢。佢的確令唱片公司同家人好痛心，但我暫時都冇打算要放棄佢，希望佢經過今次呢個大教訓會識得反省。」衞詩與關楚耀均為無綫合約歌手，無綫總經理陳志雲昨日出席港台2009推廣普通話活動啓動禮，被問到會否跟衞詩及關楚耀解約時，他說：「TVB 係同經理人公司簽合約，如果經理人公司要（與藝人）解約，咁同TVB 都唔會有約啦。」
關楚耀仍獲環球唱片公司力保，準備安排他到加拿大靜思己過。資料圖片
極度震怒的黎明（右一）除跟衞詩（右二）解約外，據悉更要衞詩搬離與衞蘭同住的寓所。資料圖片
無綫唔撐 「啱佢哋節目唔多」
無綫會否將被證實曾吸毒的衞詩及關楚耀列入黑名單？他說：「佢哋係年輕人偶像歌手，都要考慮邊個節目形象啱佢哋做。總之點都會有損失，啱佢哋做嘅節目真係唔多。」有記者建議陳志雲邀請二人上《志雲飯局》，他即說：「呢個係清談節目，如果佢哋係真心改過，最好就做禁毒宣傳活動，總之每個人犯錯都要自己承受責任。」有記者告之兩人曾擔任禁毒大使時，陳志雲不禁大叫「陰功」。至於蘇施黃昨日出席將軍澳聲援增加煙草稅大行動時，談到年輕偶像吸毒問題，阿蘇說：「作為幕前偶像搵咁大嚿錢，當然係要有啲犧牲，呢啲包括你嘅生活同行為，呢啲係package 嚟。所以啲偶像千祈唔好睇小自己嘅影響力，如果唔知就唔好做artist （藝人）嘞，特別係紅嘅藝人更加要檢點。」
陳志雲昨日暗示衞詩若被唱片公司解約，無綫也會跟她解除歌星合約。
蘇施黃指身為偶像的藝人若不清楚自己的影響力，便不要再當藝人。
毒品禍害 陳百強犧牲生命
趙碩之昨日指衞詩吸毒一事影響香港藝人形象。
蘇施黃續說：「我哋年輕時代小妖（陳百強）都係咁犧牲生命，可能娛樂圈啲人鍾意搵刺激，其實最大刺激係挑戰自己，而唔係挑戰毒品，呢樣唔挑得o架嘛！」不過阿蘇自言年輕時曾在加拿大嘗過大麻，但很快便明白到毒品禍害而敬而遠之。趙碩之昨日在荃灣出席公開活動時則說：「其實件事影響都好多，除咗同公司同事之外，行內其他藝人都有影響。我唔係唔贊成畀機會佢哋，不過佢哋要過咗自己嗰關先，因為件事都叫影響其他人，所以一定要改過。」採訪、攝影：何永寧、魯萍
全城熱話甄子丹：唔好搵減壓做藉口
甄子丹
衞詩和關楚耀上月底在日本涉嫌吸毒被捕，前日二人的唱片公司透露他們驗尿後，被證實體內含有大麻及其他「東西」，令他們再次成為全城焦點。甄子丹：做錯事就應該受罰，每個人都要對自己所做嘅事負責任，如果衞詩最後要俾唱片公司終止合約，呢啲都冇得怪唱片公司，因為佢哋唔係犯小錯。我希望年輕人唔好再搵減壓做吸毒嘅藉口，減壓有好多種健康嘅方法，年輕人一定要意志堅定去謝絕毒品引誘。森美： 藝人同香港人喺經濟唔好之下面對同一問題，好大壓力，但今次事件中好多人幫忙，滙豐獅子靠唔住，如果佢哋返嚟香港都會請佢哋上節目傾吓偈，精神壓力大可以信教作心靈安慰，唔使濫藥。戴夢夢：希望今次呢個大教訓之後，佢哋可以重新改過，佢哋錯過又試過，其實唱片公司都好被動，希望觀眾同傳媒可以畀機會，如果市場真係唔接受嘅話就好可惜。
梁詠琪
梁詠琪：藝人喺海外藏毒同吸毒，當然對香港藝人嘅形象帶嚟負面影響，咁唱片公司要對呢啲藝人作出懲罰，當然係合理，因為唱片公司花咁多心血去栽培一個歌手，如果啲歌手唔自愛，唱片公司都會好心痛，不過終止合作就似乎重咗啲，如果佢哋有悔意，係咪可以畀多一次機會佢哋呢？
方力申
方力申：其他「東西」呢個用辭好隱晦，點都好，希望佢哋快啲返香港，親身交代件事。錯就錯咗，應該畀機會佢哋出嚟解釋。不過每間公司都有自己嘅制度，總之藝人要警惕自己做個好榜樣。HotCha ：我哋同關楚耀一齊合作拍過《絕代双嬌》，佢好認真，就算冇戲佢都會去現場搵導演傾自己戲份。大家都應該自律，每個人或者藝人都唔應該掂毒品。
驗尿後被證實體內含有大麻的衞詩，將面臨被唱片公司解約的命運。資料圖片
http://appledaily.atnext. ... art_id=12495666
