𡃁界女神Angelababy 繼去年成功開拓日本市場，成為潮流雜誌御用model 後，今年再被日本Avex 睇中，隨時有機成為濱崎步師妹，跑贏同期出道、近日被公司雪藏無晒影的Janice Man 。樹大招風，後起的「邦民女」Kama （羅凱珊）於是埋身「抽水」，照抄Angelababy 到日本發展，甚至向Avex 自薦，又放風指對方對她的興趣大過「𡃁界女神」，甚至check 住對手幾時出席公開活動，再向主辦單位賤價利誘，條件是同Angelababy 同場出席。被隔空揩油，Angelababy 㷫爆說：「佢（Kama ）要咁做我都無辦法！
Angelababy 成功闖日，定期在潮流雜誌《Ray 》現身。
每次赴日工作，定必有四五名工作人員侍候，絕非人離鄉賤。
初出道，Angelababy 孖住Janice Man （左）任時裝品牌代言，但隨喺Angelababy 事業更上一層樓，今年品牌已不見Janice Man
影。（《蘋果日報》圖片）
出口術去年Angelababy 衝出香港，先後被日本《Dear 》和全日top 5 潮流雜誌《Ray 》揀中，成為御用模特兒，緊接今年一月推出有聲有動畫的網上電子寫真《LoveAngelababy Album 》，成功吸引日本Avex （濱崎步所屬唱片公司）安排見面及試音。
身價差幾班的「邦民女」Kama （羅凱珊）見珠玉在前，於是照辦煮碗學人攻日到當地行騷，日本傳媒更將兩名香港外勞作比較。踩住上的Kama 亦毫不避嫌頻頻將𡃁界女神掛在口邊，提高自己見報率。「我梗係視Angelababy 為假想敵啦！去日本發展，初步只知道會同《Ray 》（曾起用Angelababy 作御用模特兒）合作，日本market 咁大，不過我唔夠佢嚟，佢個樣喺嗰度好受落，冇法子，我扮可愛囉，因為我有酒窩！」
Kama 一向重量唔重質，只要俾得起錢，三點式示人絕無托手踭。（《FACE 》圖片）
Model agency 來港約會面，邦民女郎即放料俾傳媒報導，自提身價。（《FACE 》圖片）
Kama 在日本行騷期間，拉喺日本紅模長谷川潤合照，黐得就黐。
埋身Kama 曾經講過自細家貧，當日為完成當模特兒的心願，不惜膽粗粗向模特兒公司自薦。一不離二，Kama 重施故技，向曾接觸Angelababy 的日本Avex 自薦，之後又對外聲稱自己大有同Angelababy 爭一日長短的可能。
「唔好睇Kama 人仔細細，做嘢都不知幾有部署，同Avex sell 話自己同Angelababy 喺香港同grade ，不過學佢自己話齋，㗎仔都係鍾意Angelababy 嗰類型，對佢興趣唔大，只係做吓門面功夫見個面，完全冇好似了解Angelababy 咁，大班人殺嚟香港查佢家宅。」知情人士透露。
Kama一步一步逼埋身，最新搞作就是check 實Angelababy 出席公開活動的通告，只要有料到，她便出力游說主辦單位安排自己出席，即使對方無budget ，她照樣以超低價配合，務求與「𡃁界女神」同場出現，令外界將她與Angelababy 看齊。
本月初的生日派對上，偶像張柏芝自拍影帶祝賀壽星女，令Angelababy 感動得當場落淚。
農曆新年期間，Kama （左一）以低價利誘主辦單位，成功與Angelababy 同台出騷。（《蘋果日報》圖片）
俾Kama 頻頻抽水，Angelababy 扁晒嘴無言以對。
㷫爆「邦民女」埋身「搏懵」，Angelababy 相當不滿，更曾私底下同友人吐苦水。上週一（三月二日）出席公開活動時，「𡃁界女神」對被人「抽水」，顯得欲言又止。
壹：你識唔識Kama ？
A ：完全唔識，只係喺公開活動見過面。
壹：有無發覺近日Kama 有意無意都提起你？
A ：吓！我無留意，因為近排去咗外國做嘢，無睇新聞。
壹：咁岩佢又向Avex 自薦，仲話對方對佢好有興趣，簽咗佢做宣傳。
A ：（扁嘴）唉！你叫我講乜好，我真係唔識答！
爭崩頭近年，𡃁界女模相繼崛起，在模特兒界搶盡風頭，甚至踩界入影圈。競爭大，戰場更由香港爭到去日本。
贏條街
姓名：楊穎
（Angelababy ）
年齡：19 歲
身高：167cm
體重：43kg
三圍：32 、23 、34
廣告：麥當勞、2%、Clarins 化妝品、Catalog 、Pizza Hut 、PCCW
電影：《破事兒》
入行經過：04 年被星探發掘入行
騷價：3 萬
急凍
姓名：文詠珊
（Janice Man ）
年齡：20 歲
身高：168cm
體重：45kg
三圍：32 、23 、34.5
廣告：2%、大家樂、Bossini
電影：《十分愛》、《愛鬥大》、《愛情故事》、《內衣少女》
入行經過：14 歲被星探發掘即簽約成為model
騷價：2 萬5
車邊
（《蘋果日報》圖片）
姓名：羅凱珊
（Kama ）
年齡：19 歲
身高：168cm
體重：47kg
三圍：33B 、23 、32
廣告：邦民日本財務、迪士尼
入行經過：畢業後向模特兒公司自薦，成為邦民財務第二任代言人。
騷價：8 千
