衞詩（Jill ）與關楚耀（Kelvin ）上月二十四日在日本涉嫌藏有大麻被捕，至今仍被關押在當地的拘置所，要等到下週一（三月十六日）才公布案情，出事後即抵日的關楚耀母親，以及Jill 的經理人陳善之，亦先後返回香港靜候消息。
二人所屬經理人公司均表示，若事件屬實，將會嚴懲處分，一手發掘衞蘭衞詩兩姊妹的Amusic 老闆黎明，更怒不可遏，下令對衞詩先雪藏後解約。衞詩一錯再錯，自十歲起才開始一齊生活，對妹妹千依百順，以為這就是愛錫對方的衞蘭十分自責，認為不能獨善其身，要共同承擔後果。
連日來，衞蘭對藏毒事件避而不談，直至看到父親在三月五日記者會上痛心落淚，公開道歉未有提供一個健全家庭給兩姊妹，令衞蘭覺得自己要勇敢挺身而出。週一晚（三月九日），她終於開腔哭訴：「我累咗個妹。」
不是死刑壹：出事到而家，你都避開傳媒唔接受訪問，而家嘅心情係點？
衞：我心情好mix （複雜），但我不斷叫自己堅強嘅，呢一分鐘，我好擔心個妹，不過又冇乜嘢可以幫到佢，我可以做嘅，就係等佢返嚟，叫佢堅強去面對。
壹：有報導指你早知道Jill 喺日本俾人拉咗，但冇即刻通知公司？
衞：其實我都唔係第一時間知道呢件事，我可以講，如果家人有事，屋企人唔會唔即刻去幫忙。
一手發掘衞詩，多次給她機會的黎明，在衞詩出事後，指她若藏毒屬實，會即時解約。
女兒出事，父親Joey 上台向公眾替女兒道歉，更傷心得兩度落淚，此場面亦引發衞蘭不再逃避，勇敢承擔後果。
07 年，衞蘭（左）在紅館開個唱，妹妹衞詩做嘉賓，二人在台上更開心搭住膊頭一齊唱。（《忽然1 周》圖片）
關楚耀跟衞詩瞞住公司到日本拍拖，變成藏毒官非，前途坎坷。（《忽然1 周》圖片）
壹：點解你唔飛去日本？
衞：我好想第一時間飛去日本，好想阿妹快嘅返嚟，不過我飛去都冇用，根本幫唔到嘅乜嘢，況且Joe （經理人陳善之）已經見到Jill ，我不如留喺香港做好自己嘅工作。我覺得今次唔可以好似上次咁，匿埋屋企唔做嘢，我要將呢件事化為推動力，錄好隻英文碟，俾阿妹知道每個人都要做好自己嘅工作。
壹：Jill 今次捲入藏毒案，若果公司證明係事實，就會同佢解約，你覺唔覺得公司絕情？
衞：公司無論點樣決定，都係為阿妹好，事實係阿妹做錯事，做錯就要認錯，要負責任，要受懲罰。而家公司唔係判佢death penalty （死刑），我覺得經過呢個教訓，阿妹先會有機會改變，我好了解佢嘅性格，佢知道自己做錯，一定會接受懲罰。我同阿妹感情好好，但佢做錯一定要受罰，我唔會幫佢，因為咁樣先會令佢真係明白，每個人做錯事，都要承擔後果。
今年一月，黎明跟衞蘭一齊演出《勁歌金曲》節目，在老闆身邊的衞蘭笑得特別開心。（《蘋果日報》圖片）
承擔後果壹：怕唔怕Jill 拖累你？
衞：一定會有少少，我哋係孖生姊妹，大家自然會將我哋連埋一齊講，不過喺呢個圈幾年，我好明白要承受呢啲壓力，我係好擔心阿妹，但盡量唔俾呢件事影響到我，我話俾自己聽要更加做好嘅。
壹：最近有傳媒將去年「迷幻雙嬌」事件重提，仲暗示你同Jill 係當事人？
衞：件事過去咗，我唔想諗，亦唔想俾呢啲新聞影響自己，我只係擔心自己講錯嘢連累到阿妹。我唔會再嬲，亦唔會因為有自己嘅報導就即刻去解釋，我會講，有時見到嘅嘢，同事實係兩回事。
壹：咁你有冇吸毒？
衞：冇，真係冇，我要close file 。
衞蘭上週照常到錄音室錄歌，但平日笑容滿臉的她，因擔心妹妹前途而臉容憔悴，雙眼紅腫。
盲目愛錫壹：你會做嘅咩去幫Jill ？
衞：佢返嚟之後，我會叫佢休息一段時間，諗清楚自己做錯嘅事，唔可以再錯落去。坦白講，阿妹做錯事，我都有錯，因為佢係俾我同爹哋縱壞，我哋一直用盲目方式支持佢，blind 去愛佢，關心佢，用錯嘅方式睇住佢。認識阿妹嘅人都會知道佢有attraction ，就算做錯事，冇人想繼續鬧佢。我記得十六歲嗰年，阿妹好想去朋友嘅生日party ，爹哋講明唔可以出夜街，我當時都有阻止佢，但見佢已經ready 晒，最後都係俾佢去，佢好似一隻馬咁，根本唔會聽人講。
衞蘭07 年9 月在廣州開演唱會，身在韓國的母親特地飛到當地欣賞，難得跟母親見面，兩姊妹黐到實，形影不離。（《蘋果日報》圖片）
壹：你好遷就Jill ？
衞：我哋family 背景好差，爹哋媽咪喺我哋六歲時離婚，我跟媽咪去咗韓國，阿妹就跟爹哋喺香港，直至十歲，我返嚟香港生活，先開始真正相處，爹哋唔算好管我哋，但有佢嘅rules （規矩），一定要我哋七點前返到屋企食飯，我十八歲就做part-time ，喺internet cafe 煮公仔麵，做侍應，媽咪當時已經冇錢俾我哋，爹哋夾band 賺錢唔多，我要養阿妹，佢嗰陣同嘅in 人一齊玩，每隔兩三個月就要買新袋，我好錫佢，好多時都會買俾佢。由細到大，佢冇responsibility ，就算佢出嚟做嘢咁耐，都係我同爹哋養佢。上一次，佢仲未知道做錯，今次呢個case ，我諗佢會得到教訓，會大個女。
關楚耀與衞詩去年底出席「禁毒滅罪耀北區2008 」音樂會，向市民宣傳禁毒滅罪訊息，二人上月被揭捲入藏毒事件，令政府有關部門大為尷尬。（《蘋果日報》圖片）
（《蘋果日報》圖片）
唔會賴人壹：你點幫自己度過呢段時間？
衞：唔好諗咁多，朋友就算打電話嚟關心我，我都會叫佢哋唔好講，唔好提，我唔想日日聽住呢啲新聞，我唔睇電視，唔聽radio ，只係想正面嘅去諗成件事。
壹：你點安慰爹哋媽咪？
衞：公司將記者會錄低俾我睇，我睇到一半已經唔敢睇落去，因為我見到爹哋喊，爹哋好傷心，但佢依然出現記者會同大家道歉，佢肯企出嚟面對成件事，亦令我明白到自己要承擔，所以先接受呢個訪問。我有同爹哋講對唔住，因為我冇好好睇住阿妹，係我累咗佢，以前一直用錯嘅方法錫佢。媽咪冇嬲過我哋，仲叫我唔好擔心，話會冇事，佢話阿妹經過今次事件會長大，可以重新做人。（開始哭得泣不成聲）我好擔心阿妹，我怕佢返嚟之後會好難面對，不過我會叫佢strong 嘅。
衞詩在○六年獲孖生家姐衞蘭引薦加入樂壇，以節奏強勁的快歌為主打，之前她在衞蘭的演唱會上，更以性感打扮，表演勁歌熱舞。
來自音樂世家的關楚耀，父親關維麟是寶麗金年代當紅監製，叔父是著名歌手泰迪羅賓，自發生藏毒事件後其契爺譚詠麟大怒，更聲言絕不會姑息自己的契仔。（《忽然1 周》圖片）
壹：有人覺得關楚耀係俾Jill 教壞？
衞：爹哋同公司成日教我，做人係唔應該講人哋嘅嘢，做錯事亦唔應該賴人，我都唔會諗阿妹係咪俾人教壞，總之錯咗就係錯咗，經過今次事件，阿妹會成熟嘅。
壹：Leon 有咩同你講？
衞：我諗佢係失望多嘅，我同佢心照，好多嘢唔需要解釋咁多，出事後，佢只係拍一拍我膊頭，冇講過任何嘢。
壹：你係咪好大壓力？
衞：我真係好大壓力，阿妹嚟緊可能完全冇收入，雖然我不嬲都養阿妹，但我唔能夠養佢一世，或者阿妹遲嘅想自己搬出去住都唔定（不斷抹眼淚）……其實阿妹都好有其他方面才華，佢整jewellery 好叻，fashion 又好叻，佢成日都會幫我襯衫（忍住眼淚）……我真係擔心佢返嚟唔知點面對，不過佢應該tough 過我，應該好快就冇事。
累己累人衞詩、關楚耀於日本涉藏毒至今仍被拘留，二人的爛攤子，要由雙方家人、唱片公司等身邊人收拾，累己累人。
24/2 ︰現年25 歲的關楚耀與26 歲的衞詩，於東京澀谷道玄
一間大型雜貨店Don Quijote 購物期間涉嫌高買，店員即時報警，被警方發現身上藏有大麻，涉嫌違反《大麻取締法》，當場被捕。二人目前被拘留在葛飾區的東京拘置所。
28/2 ︰關楚耀的母親得悉兒子出事後，趕往日本探望兒子及安排當地律師作出營救，關楚耀向母承認曾經吸食大麻，不過否認偷竊。
（《蘋果日報》圖片）
3/3 ︰譚詠麟出席港台活動，提到契仔在日藏毒一事，一臉嚴肅地說：「我今日心情起伏好大，好痛心……我唔會因為佢係我契仔而去姑息佢，如果佢有錯，唔單只錯要認，打要跪……」
而衞詩所屬的Amusic 唱片公司老闆黎明出席同一活動時，表示不容許公司有同類事件發生，暗示會對衞詩作出處分。由於關楚耀及衞詩曾擔任禁毒處的「跨境不濫藥」活動嘉賓，禁毒處發言人表示，日後會仔細考慮邀請參與禁毒宣傳活動人選。
4/3 ︰衞詩家姐衞蘭由大埔道住所返到九龍塘唱片公司與老闆黎明開會，受衞詩事件困擾，衞蘭一臉憔悴。
5/3︰衞詩的經理人陳善之赴日營救，同日她所屬的Amusic 唱片公司三名高層聯同其父親Joey Vidal 就事件舉行記者會，Joey Vidal 兩度落淚，希望大家可以給其女兒機會，並在公眾面前為女兒的事道歉，但唱片公司方面則表示會長時間暫停衞詩的工作，甚至與她終止合約。
6/3 ︰演藝人協會於觀塘會址舉行例會，主席譚詠麟表示因契仔關楚耀藏毒而感到傷心，又激氣到怒叫關楚耀返加拿大洗碟。
破碎家庭衞蘭與衞詩的菲律賓籍父親Joey Vidal 在記者會上兩度落淚，雙手震抖，語帶哽咽地自責沒有提供一個健全的家庭予阿Jill 成長，又為女兒的事向大家致歉。
衞蘭與衞詩出生不久，父母便離異，衞蘭隨母居於韓國，10 歲才再度跟父親JoeyVidal 及孖生細妹衞詩重逢，由於衞詩自小跟隨父親生活，與韓籍母親感情疏離。
現年51 歲的衞父Joey Vidal 曾任職酒廊歌手，是樂隊主音，迷倒不少女歌迷，身邊不乏女伴，過去亦被傳媒拍下帶性感妙齡女伴返家過夜。衞詩○六年由當時已入行的衞蘭引薦入行，出道後亦曾獲多個新人獎，可惜不時傳出負面新聞。
藝人藏毒 罪加一等衞詩及關楚耀在日本涉嫌藏毒，二人至今被拘押十多天，歸期未卜。前日本富士電視香港顧問，有「日本通」稱號的林沙文大律師表示，日本法律與本港法律存有差異，本港規定對疑犯只能拘留四十八小時，不過日本方面就可以拘留二十三日，才決定是否正式作出起訴，一般輕微刑事案可以加快審訊，當地稱為「即決裁判」，拘留二十三日或以內，再加十四日，即最遲三十七日便可押解上庭。
「日本方面會覺得藝人藏毒，相比起平民百姓係罪加一等嘅，越有知名度，判刑可能會越重。」林沙文說。
不過林沙文亦表示，關、衞二人亦有可能判緩刑，「如果證實佢哋高賣係一場誤會，佢哋就可以行使『人權法』，變相係差人冇權搜佢哋嘅隨身物品，佢哋嘅律師大狀有機會運用『人權法』，因為差人係喺誤打誤撞情況下搜佢哋身，違反法例精神，搜出嚟嘅毒品有可能唔能夠成為呈堂證物。」
