上年青協舉辦嘅青年就業博覽喺荷里活廣場進行，全場爆滿，有唔少年輕人嚟搵工，今年舉行嘅青年就業博覽更有超過3,000 份工進行招聘，各年輕人咪錯過喇！
最近聽到好多鋪頭結業嘅消息，就連殿堂級滬菜食府雪園飯店嘅北角分店都執埋笠，實在係人心惶惶，而而家連大學畢業生去實習都只係得4 千蚊，咪話唔令年輕人灰心。不過，我發錢韓相信天無絕人之路，好似香港青年協會（青協）喺3 月23 日同24 日搞咗個「青年就業博覽」，主要係幫15 至35 歲嘅年輕人搵工，呢個博覽仲會有成3,000 份工畀你見，最特別嘅係會有即場求職面試指導服務，幫你睇吓適合做咩工同教埋你點見工。
「青年就業博覽」
日期：3 月23 日至24 日
時間：上午10 時至下午7 時
地點：大角咀奧海城2 期地下主題中庭
查詢電話：3113 7999
參考網址：
http://yen.hkfyg.org.hk/yen/index.php
今次參加博覽嘅僱主有成43 間，主要係嚟自飲食、零售、民航保安、物業管理、美容、旅遊、教育同通訊業等，當中包括大快活、現代美容中心及恆基兆業地產集團等；工種可以話係包羅萬有，各職位月薪平均有$5,000 至$8,000 ，而大部分工都只係要求求職者有中五學歷。青協發展幹事何小姐話：「我哋知道嘅年輕人喺海嘯之下好徬徨好難搵工，所以希望搞個就業博覽可以幫到佢哋。到時嘅僱主會喺攤位度介紹佢哋嘅工作，會直接解答求職者嘅問題，或者喺現場同求職者做即場面試。」
大快活請超過500 人
好似大快活就希望喺呢個博覽度請508 個人，佢哋喺九龍、港島同新界嘅分店都需要全職同兼職嘅員工，職位包括前線水吧服務員、收銀員、助廚、見習主任等。以助廚為例，人工由$5,300 起，主要負責簡單廚務，協助準備食材及烹調工序嘅工作，佢哋希望請嘅刻苦、好學、有上進心同責任感嘅員工，初中就做得，如果對一般廚務有認識仲會有優先；除咗人工外，仲有免費膳食、有薪年假、醫療津貼同獎金等。而恆基兆業地產集團則打算請151 個人，全部係全職工作，職位包括會所助理、服務員、客戶服務大使及保安員；當中會所助理中五就做得，人工會有$7,500 至$8,500 ，要有良好嘅中、英語能力，需具有一年以上會所、康體服務或客戶服務經驗，一年會有14 日年假，仲有年終獎金、醫療保險同進修津貼添。
何小姐仲話佢哋喺博覽嗰日，會有個即場嘅求職面試指導服務，指導時有社工幫年輕人做性格測試，睇吓佢哋岩做咩工作，會畀大約20 條問題年輕人作答，然後測試佢哋嘅性格，例如測出佢哋對數字敏感嘅，就會建議佢哋做文職嘅會計工作。如果年輕人對見工有疑問，亦可以向社工提出，等社工幫你解答見工疑難。到時只要walk-in 就可以參加求職面試指導服務，有咁好嘅一條龍服務，仲唔快嘅去參加！
