最好匿埋廁所玩！
上年《Monster Hunter 》喺PSP 推出，搞到全城game 迷、潮人同明星都中毒日夜煲機。
而PSP 新作《真．三國無雙Multi Raid 》就照跟芒亨元素，加入組隊玩法、合成道具及4 人連線合作，搞到成班商台潮人棄芒亨打無雙，而芒亨死忠粉絲商台DJLeo 更將《無雙MR 》形容為「流劈」game 一隻：「之前我都有玩過《無雙》，不過就覺得佢玩法好單調，來來去去都係流劈就搞掂。咩叫流劈？斯文嘅嘅講法嚟啫，即係冇目的亂劈囉！」
Spec.
機種︰PSP
類型︰ACT
廠商︰KOEI
人數︰1-4 人
售價︰$338
查詢︰i-Gamer
（深水
福仁商場地下G16 鋪/2725 3338 ）
覺醒前 未變身前，趙雲只係普通靚仔一名。
覺醒後 覺醒後成個騎士look ，全身爆氣加發光，十足撒亞人。
《無雙MR 》內可以用「武幻」進行武器強化，除咗會改變武器外形之外，更可以加入特殊動作，令每把武器都各有特色！
Leo 話《無雙MR 》冇自創角色，而且衫又只得幾套揀，呢樣嘢比起《芒亨》較輸蝕。
三國武將神打上身
Leo 打咗成年芒亨，突然跟大隊轉game ，點睇？「頭兩日真係冇乜feel ，但斬斬吓又幾得意，而且仲可以標童，爆氣嗰下確係幾型！」所謂標童指每個角色都有覺醒狀態，只要儲滿氣之後同時按△同○就可以發動。進入覺醒狀態之後，角色外形唔同晒，能力大幅提升之餘亦可以用到更強招式，好似靚仔趙雲就變咗做白騎士、肥佬董卓覺醒之後就成隻野豬咁，三大勢力超過36 個角色，睇變身都有排睇！
連線打時仲可以輸入表情指令，似足而家嘅online game 。
虎牢關有老虎咬你之餘，仲有勁大隻嘅神獸辟邪同呂布一齊出場，一條友冇可能過到！
4 人圍揪七國咁亂
講到4 人圍揪，Leo 就認為兩者分別頗大。「打《芒亨》斬龍時要玩得好有戰略，因為要打龍嘅弱點，每人都要負責唔同工作；不過《無雙MR 》一味湧上去就得，比較易玩！」其實《無雙MR 》打大佬都好講戰術，只係Leo 未玩到較後版數啫，好似第二章打呂布時，就一定要4 人分散攻擊，1 個人打老虎，2 個人打辟邪，然後再搵人引開呂布先打得贏！
Leo 嫌都市育成方面太過簡單，只係搵人物咭加落去就可以自動開發，如果可以做得仔細嘅，加入《三國誌》嘅玩法，肯定佢可以勁得多！
夠18 級就可以去轉生，而轉生時可以保留角色武器同道具，不過等級同能力值就冇得繼承，呢方面就比《芒亨》好，起碼想轉人都唔使重新開始遊戲。
必殺技夠浮誇
雖然Leo 對《無雙MR 》要求多多，但佢都大讚今集夠創意，而且《無雙MR 》贏在動作變化多，仲可以愈學愈多招式，其實劈得比《芒亨》更加爽︰「每種武器都有唔同動作，而且覺醒同必殺技夠晒浮誇，呢樣嘢《芒亨》真係比佢唔上。」
《無雙MR 》玩法簡單，而且每版時間唔長，去廁所開完大就玩完一鋪，夠晒快靚正。
Leo 總評：要同friend 鬥搶
「4 個人連線打時都好順，但由於每版敵人唔多，搞到成日爭嘢打搶道具，係friend 都冇情講，始終呢類有得儲嘢game ，都有一定毒性最岩我呢類儲道具嘅game 迷玩！」
