經歷了「慾照風暴」的鍾欣桐（阿嬌），嘗過由天堂跌落地獄的滋味，捱過四百多天黑暗歲月，昨日頭炮復工出席記招，期間阿嬌拒談論舊愛陳冠希，講新歡麥浚龍時就甜笑，講過氣緋聞男友方力申時就冷笑，飽受情傷的她目前不再談情，但講到好姐妹蔡卓妍（阿Sa ），阿嬌卻失控哭了！
昨午阿嬌到九龍灣國際展貿中心出席Bauhaus 旗下品牌TOUGH Jeansmith 代言人記招，踏上一年前陳冠希宣布退出香港娛圈的場地，開始她的復工之路。整了一頭曲髮的阿嬌，穿上代言品牌服裝，不知是否緊張到腳震，踏上幾步樓梯上台，都要握著扶手，阿嬌雖然笑對現場逾百傳媒，但笑容繃緊，明顯十分緊張。簽約儀式後阿嬌臨場加插自白：「休息咗一年多，呢段時間好漫長，好難捱，但我好幸運，有多人支持，有朋友、媽咪、妹妹、同事，好感動（眼泛淚光），仲要多謝一班一直支持我嘅歌迷，佢哋好傷心，每日為咗我同人爭辯，又對我不離不棄（語窒，透一口氣）。多謝Bauhaus 喺咁重要嘅時候畀我成為亞太區代言人，重新對我信任，呢一年我經歷好多，成長好多，令我變得更加堅強面對嚟緊嘅困難，我會好努力、好努力面對工作。」
Bauhaus 老闆力撐
同時，阿嬌任Bauhaus 的品牌代言人惹起一些反對聲音，但Bauhaus 主席黃銳林指阿嬌堅強和永不言敗的精神與品牌主題「be TOUGH 」配合，他們希望市民欣賞品牌廣告及背後理念，亦希望大家給阿嬌機會，支持她復出，並承認酬勞達七位數。另外，英皇行政總裁吳雨亦現身記招，他說將為阿嬌開舞台劇，電影仍在斟洽中，不想一下子排山倒海給阿嬌工作。對有傳四川某汽車廣告嫌阿嬌酬勞太貴而未有合作，吳雨稱沒聽過傳言。
昨日的記招約廿分鐘結束，之後阿嬌在經理人霍汶希陪同下再接受訪問。
嬌＝鍾欣桐 記＝記者 霍＝霍汶希
記：記者會前有冇食鎮靜劑？
嬌（搖頭）：冇
記：冷靜好多？
嬌：平復好多，但好緊張，好耐冇見咁多傳媒。
記：用乜方法平復心情？
嬌：通常都喺張床大被
過頭，唔諗咁多。
記：聽日去旺角出席活動，怕唔怕有市民亂講嘢？
嬌：好多嘢預咗，隨心囉。
記：有人話你上《志雲飯局》背稿？
嬌：我記性好差，就算畀稿我都唔記得，唔知佢問我乜問題。
記：知唔知網上有人抨擊你？
嬌：我上百度入自己group 睇，唔好嘅嘢都刪晒，睇唔到，唔好批評一定有，唔好聽囉，繼續做好自己。
記：Edison 有冇打過電話畀你？
嬌（搖頭）
霍：唔好講。
夥師妹拍廣告
記：嚟緊有乜工作？
嬌：除咗Bauhaus 廣告，仲有護膚品廣告同Yumiko （鄭希怡）一齊代言。
記：有傳你三折價接廣告？
嬌：我唔知幾多錢。
記：有傳如果反應唔好，就叫Yumiko 頂上？
霍：唔係，廣告商想搵兩個唔同女性代言護膚品牌。
記：知唔知有網友話罷買Bauhaus ？
嬌：都唔關Bauhaus 事，希望大家唔好咁諗。
記：反對聲音會唔會打擊你信心？
嬌：Bauhaus 畀我好大信心，好感激佢哋搵我做代言人，多謝佢哋肯冒呢個險，我會盡力做好自己。
記：酬勞同出事前有冇分別？
霍：差唔多，數字係秘密，感激客戶支持。
記：感激價？
霍：合理價錢，唔係三折，都有七位數。
記：九展場地邊個揀？
霍：係我揀，香港冇乜場地招待到過百傳媒，呢度寬敞啲、有得坐。
記：有冇牽起回憶？
嬌：點解？
記：Edison 一年前喺呢度開記者會。
嬌：唔關係，香港好細，冇所謂，做嘢
。
記：停工一年經濟有冇問題？
嬌：都有儲蓄，冇問人借錢，只係公司畀住先，我會還。
記：有報道話你賣樓？
嬌：唔係急放，只不過樓市唔好，租畀人。（夠畀租金？）夠。
出售一個單位
記：係咪賣咗一層樓？
嬌：係，樓市跌人人都蝕。
記：依家經濟OK ？
嬌：OK 。
記：經濟OK 有冇諗過唔復出？
嬌：未至於夠成家人過一世，自己鍾意做呢行。
記：Juno （麥浚龍）有冇話照顧你一生一世？
嬌（笑）：冇
記：佢話支持你復出？
嬌：好多朋友都係，佢都有，今日佢有sms 我，話支持我復出，叫我加油。
記：方力申話你博宣傳？
嬌：佢有打電話畀我解釋，佢講「宣傳片」唔係「宣傳」，小方好支持我，叫我唔使理出面新聞。
記：小方唔認同你拍過拖？
嬌：傳過
。
記：咁有冇拍過？
嬌（冷笑）：冇，佢話冇咪冇，算啦，過咗去。
記：咁Juno 有冇追你？
嬌（甜笑）：冇喎，好朋友囉。
記：暫時唔拍拖？
嬌：暫時唔會。（驚咗男人？）唔係，今年對我好重要，努力工作先，太耐冇做嘢。
記：會唔會轉形象行性感？
嬌：反差冇咁大，睇廣告、電影需要。
讚
芝有勇氣
記：支唔支持張
芝復出？
嬌：支持，佢講得好好。（認同佢話Edison 貓哭老鼠假慈悲？）呢個唔適宜評論，佢好有勇氣。
記：支持Edison 復出？
嬌搖頭冇答，霍汶希即拉走她結束訪問，之後阿嬌接受電視台訪問，她表示今年最大領悟是對生命有啟發，去過四川探訪，見到災民生活困苦，但都開心過日子，令她能好好學習。
談阿Sa 即流淚
講到阿Sa ，阿嬌兩眼谷滿淚水，鼻紅口震說：「阿Sa 一個人支持Twins 唔容易，見到佢好
，我打畀佢講對唔住，佢就話：『傻啦！唔好咁講。』我哋感情好深，佢對我好好，唔可以再辜負佢。」說完終忍不住流下一滴淚水，霍汶希見狀即拉走她，結束訪問，之後阿嬌在助手陪同下返家。採訪：音樂組
阿嬌在台上經常面帶笑容。
阿嬌感激Bauhaus 邀請她任代言人。
阿嬌接受傳媒訪問時，經理人Mani 在旁協助。
