羅大佑、李宗盛、周華健同張震嶽組成嘅Super Band ，前晚喺台北小巨蛋舉行演唱會，吸引林志玲、張艾嘉同庾澄慶等捧場。阿嶽唱《我愛台妹》嘅其中一句歌詞：「對我來說，林志玲算甚麼。」唔知台下嘅林志玲有乜反應呢？李宗盛前妻林憶蓮送上鮮花，曾同李宗盛及羅大佑傳緋聞嘅張艾嘉更親自捧場，佢澄清同兩人嘅緋聞都唔係真，佢反而最想睇阿嶽嘅演出。
李宗盛（左）同周華健喺演唱會度落力獻唱，令歌迷拍爛手掌。
羅大佑演出時表情多多，忽然做出趣怪表情。
歌迷舉Bra 示愛
擔任鼓手嘅張震嶽演出賣力。
演唱會上，阿嶽化身鼓手、羅大佑擔任鍵盤手、華健同李宗盛就彈結他，其間有女fans 高舉藍色大胸圍向佢哋示愛，羅大佑話呢個舉動係挑逗老男人。李宗盛獻唱同前妻林憶蓮嘅招牌歌《當愛已成往事》，佢話當年唱呢首歌，正忙緊同憶蓮約會，仲話分開後更了解對方，又感謝生命中出現過呢位紅粉知己。到尾聲，阿嶽叫觀眾起身，一萬名歌迷即刻又唱又跳，李宗盛話想叫大家企身好耐，事後佢語帶雙關話：「男人年紀大要『站』起來不易！」採訪、攝影：黎寶萍
張艾嘉到場支持，但強調同李宗盛及羅大佑嘅緋聞唔係真嘅。
http://appledaily.atnext. ... art_id=12468015
