沉默年多的淫照女主角張柏芝，日前忽然現身接受有線訪問，更在節目內狂插淫照男主角陳冠希「貓哭老鼠假慈悲」，原來柏芝開腔前未曾通知奶奶狄波拉（拉姑），拉姑昨日接受商台節目的電話訪問時就以「個心滴血」來形容這年多以來的心情，她更支持新抱「企出來」取回公道，並大讚柏芝是超好新抱。此外，柏芝日前又在台灣《模范棒棒堂》節目中為好友范瑋琪現「聲」，因范范要與嘉賓羅志祥比拼誰的藝人朋友大牌，故范范即場致電柏芝，當柏芝得知范范致電的來意後，欲叫身旁的Lucas 向眾人打招呼，但精靈可愛的Lucas 可能不小心碰到收線的按鈕，故掛斷了電話。撰文：林妃
主：主持 拉：拉姑主：你個心滴完血未？拉：唉！滴血係漫長，係成年時間咁滴，唔係話好就好，係心痛咁好嘅新抱，一個女性抱住個仔，面對親友唔知點講，而家放下心頭大石，做家人大家應該係風雨同路。
陳奕迅留言慰問
柏芝早前勇敢站出來接受有線訪問，獲拉姑支持。有線電視圖片
主：發生件事，你一直唔評論，希望件事快啲停，呢年嘅心情又唔可以講出嚟，身邊人又要扮冇嘢。拉：扮冇嘢一定有，有啲唔講就會埋嚟拍下你膊頭，有啲長輩擔心大嘅、細嘅，佢就會攬住你，人始終係肉體，當有人攬住你就會崩潰，因為我冇辦法同人講點呀點呀，所以有一個長輩過嚟想少少保護你時，你就會喊到收唔到聲，我試過好多次，因為你唔孤單，係有人好疼錫呢個家庭，當中有個人會久唔久就打個電話嚟，但係佢次次都只係喺電話錄音機中同你傾偈，一年有四、五個，係好心甜㗎，呢個就係陳奕迅。主：同後生冇代溝？拉：點可以有代溝啫，我試過坐飛機有auntie 問我，你個耳仔做乜打咗三個窿，我就話十幾年前我個女要打一個窿，我就同佢死過，而家我釘三個就證明我同佢冇代溝，有乜嘢都可以同媽咪商量。呢樣嘢係得㗎！始終仔女有個咁嘅爹哋（指謝賢），佢過啲畸形、豁達開通對待仔女，做媽咪個位辛苦啲。主：咁而家教孫仔有冇分歧?
拉：孫仔係縱，唔係教，留番畀佢爹哋、媽咪教，我做咗一世壞人，所以喺孫仔面前
係好人，不過柏芝唔係縱，只係佢係24小時做全職媽咪，好似我哋湊霆鋒時都係好緊張，到妹妹就任玩，所以快啲生多第二個佢就冇咁辛苦，但唔使催，順其自然，我幫佢補好而家身體先，因為佢之前太心急減肥，急得滯，將身體減到好虛好弱，而家就由頭再補過。
為報道喊12粒鐘
拉姑在訪問中狂讚柏芝好新抱，更希望她盡快調養好身體再為謝家添丁。
主：件事已經放低成年，有啲淡忘咗，係唔係覺得件事唔講仲好？拉：唔講呢，受傷嘅人會繼續企起暗角，有人仍然喺度話我有保護你，我覺得佢哋係時候為自己嗱番個公道，我哋真係冇嗱過任何嘢，我唔係法官，但以女性嚟講，覺得佢哋係有權利。主：成日報道都話你同柏芝不和?拉：其實最滴血係你行過報紙檔、等的士時要避開啲封面、報道，呢樣嘢先係呢一、兩年最辛苦，我哋私底下咁好，大家都愛大家，但係唔知我做錯乜，點解啲人話我壞奶奶、衰奶奶，我有個朋友睇唔過眼話要搵律師告佢哋，本來真係有告，但係知道到時有乜新抱就要出嚟，咁咪害咗新抱，害到家庭永無寧日，所以就冇告，點知啲雜誌又得寸進尺……我試過為本雜誌由晚上9點喊到第二朝9點，（語帶激動及哽咽）到底我做錯乜嘢，我樣樣咁小心，但得到個形象咁衰嘅衰奶奶，我即刻衝去人哋雜誌社表態，畀條生路我行，你睇我幾愛我新抱，大家都有痛。主：事前知唔知柏芝會出嚟講呢件事?拉：唔知，我唔喺香港，佢哋大個啦，係嗱專業意見，唔係奶奶意見，自己唔介意，你話我要做乜，我就配合你，我都學放手已經兩年半……總之睇到就當睇唔到，想講，講咗嘅嘢等如冇講就唔好講，適當時候就交流下，當唔識去問佢。主：柏芝話你超錫佢？
拉：係呀！佢超好，入門第一日大家就講明你做新抱嘢，我做奶奶嘢，大家各做各崗位……她真的很棒，佢真係做岩新抱個位，佢知道老人家鍾意乜……個心滴血，當你知道佢受傷，當你知道大家隻眼唔敢望對方，想攬住佢狂喊，但又唔敢，過種感覺好辛苦，由頭到尾都冇講過任何嘢。
勿再評論陳冠希
拉姑笑稱謝賢是畸形爸爸，令她養育子女時特別辛苦。
主：覺唔覺得自己好幸福?拉：有一日我睇電視話老人癡呆症，而我身邊有朋友60、61歲就有老人癡呆症，所以我想同大家分享，我仲想寫遺囑、平安紙，因為見好多官司打，所以唔想寫，到底video 受唔受？最多請10個律師企喺度，費時帶畀家人麻煩，我想錄晒想講嘅嘢，我每人畀一段說話。主：對方（指陳冠希）話將一年收入捐出嚟做善事。拉：好難去講呢件事，我身份咁尷尬，細路仔個個都有錯，錯咗就互相改過，互相幫助大家，唔好一面倒。而家金融風暴，大家要正面啲，愛身邊人，珍惜身邊嘅嘢，唔好再評論佢，改唔改到乜嘢，救唔救到乜嘢，希望佢做多啲，令曾經俾佢傷害過嘅人，快啲好似佢所講咁走出困局。
柏芝涉及淫照事件令一家人更加團結，拉姑更直言仍然痛心好新抱要面對的一切。資料圖片
http://appledaily.atnext. ... art_id=12430191
