鄧麗欣（Stephy ）同傅穎（Theresa ）自Cookies 四餅分拆上市以來，屢傳不和，兩人出席公開活動面左左，近日兩人不和升級，Stephy 玩小圈子孤立Theresa ，Theresa 亦不甘示弱，向傳媒爆料指有人在blog 留言：「做乜我要同佢爭」，明示暗示此人正是宿敵Stephy 。
兩女正面交鋒，身為緋聞男友的方力申竟代出頭，打電話同曾經岩傾岩講的Theresa 講數，勸對方收口。對於昔日好友有異性無人性，Theresa 還擊：「我幾時有搞過小動作！」
明刀明槍
由去年Theresa 同Stephy 的成績開始接近，二人不和亦愈來愈浮面。連續兩年，Theresa 都以怕煙味為理由，缺席Stephy 生日會，本月初公司金牌春茗，Stephy聯同Miki 、Kary 玩小圈子，杯葛Theresa ，令她全晚孤零零，無人理。
你有張良計，我有過牆梯。勢孤力弱的Theresa 靠自己，先是同傳媒爆話有人在blog 留言指責她爭寵：「有人喺blog 留言話做乜我要同佢爭，我好怕俾人誤會。」之後，再真空上陣，直踩Stephy 新片《保持愛你》的首映，成為全場焦點，女主角頓變陪襯品，慘敗！
兩女明刀明槍，眼見女友被死敵踩到上心口，曾與Theresa 分屬好友的方力申，於是強出頭，打電話勸Theresa 唔好再搞小動作，擺Stephy 上枱。
Theresa與方力申本來關係友好，Theresa 前男友Neal 亦是由他介紹，但自與Stephy 搭上後，兩人友好便不再。昔日好友有異性無人性，Theresa 不單只當耳邊風，還唱通街笑指方力申做「架梁」。
「Theresa 當笑話周圍同人講，話方力申打俾佢，叫佢唔好搞小動作，唔好高調表明自己同Stephy 唔妥，連salon 嘅junior 都講一餐，擺明要落Alex （方力申）面！」Theresa 身邊友人說。
Theresa 真空露背踩場出席《保持愛你》首映，表現風騷，搶盡風頭，女主角Stephy （箭嘴）頓變陪襯，全程顯得悶悶不樂。
Theresa 與方力申分屬好友，06 年Alex 充當紅娘拉攏好友Neal 與女方成為拖友。（《蘋果日報》圖片）
06 年Theresa 被影到素顏與Neal 撐枱腳。（《壹本便利》圖片）
左二起：Miki 同Theresa 曾因Stephy （左一）率先跑出而杯葛對方。
去年10 月曾被Stephy 搞小圈子杯葛的Theresa ，在blog 留言表達不滿。
搬屋出事
Stephy 同Theresa 在九餅年代一直相安無事，不過自九餅變四餅，公司無再提供宿舍，Stephy 一度提議同Theresa 、Miki 合租一個單位同住，但礙於當時Theresa 與何韻詩「有來往」，未有接受Stephy 租屋同住的提議，因而開始有心病；未幾Stephy 率先彈出，Theresa 於是聯同Miki 夾擊杯葛Stephy ，自此兩人勢成水火，正式結怨，加上近年Theresa 急起力追，與Stephy 成績叮噹馬頭，二人更加勢成水火。
星期日（二月二十二日），Theresa 為新碟舉行音樂會，對於方力申要她收口一事，表現相當激動，「我無收過方力申電話，從來都無收過方力申電話，我幾時搞過小動作，我好清楚自己唔係一個搞小動作嘅人，我從來都無收過方力申任向SMS 同電話！」
錯綜複雜
三個女人一個墟，Cookies 九變四，Stephy 、Theresa 早因住屋問題鬧不和，及後四餅分拆上市，率先彈出的Stephy 被群起圍攻，昔日的合作伙伴，頓變陌路人。
