邵氏60年代嘅紅星胡燕妮同康威生嘅仔尹子維，已經34歲嘅佢星途黯淡，緋聞卻花哩花綠，成日都俾人見到佢攬女蒲吧，前日凌晨佢喺蘭桂坊Volar 夜蒲蒲出禍，俾人爆樽。
休息一晚即綵排
焦媛話唔擔心受傷嘅尹子維會影響話劇綵排。
據知尹子維同三個男性朋友喺尖沙嘴結識咗兩個講普通話嘅女仔，六個人結伴轉場再蒲，尹子維去廁所時同三個男人發生碰撞，之後俾人襲擊，佢由朋友陪同去律敦治醫院縫針。休息咗一晚，尹子維噚日喺上環綵排話劇《金鎖記》，花咗10分鐘同記者解畫。
「的士上有玻璃樽」
前日凌晨遇襲受傷嘅尹子維，噚日立即亮相見記者，乘機宣傳有份參演嘅話劇。
尹子維用帽同墨鏡遮掩傷勢，縫咗6針嘅右手拇指用紗布包住，佢點都唔肯除低墨鏡展示傷勢，佢話：「希望保持靚仔樣。」尹子維自稱從來冇同人結怨或捲入桃色糾紛，佢話：「我喺Volar 消遣期間，有陌生人襲擊我，朋友就送我上的士去醫院，我先去養和，但護士建議我去有警察當值嘅律敦治，我唔認得打我嘅人，當時大家一句嘢都冇講過。」對於被指俾人爆樽，尹子維話：「對方只係用拳頭打我，但的士上有個玻璃樽，不過細節嘅嘢都唔方便講。」佢仲講朋友話佢犯太歲，佢話：「而家犯咗就冇事，我專心排戲。」
尹子維戴住墨鏡同鴨舌帽遮掩臉上傷勢。
http://appledaily.atnext. ... art_id=12336651
