當懷孕3個月的陳慧琳踩住3吋高踭鞋百無禁忌扭腰示眾，大肚婆給人浮腫、遲緩的感覺終可洗底。世界大同，早前韓星金喜善、權相佑太太孫泰英等都紛紛拍孕婦寫真，強調女性懷孕之美。妳，又是否也想留住這一刻？記者：林佩婷攝影：林柏鈞
過來人：難得大肚留倩影
Kammy 在懷孕5至6個月時曾經有諗過拍寫真，但中途卻打消了念頭，原因是受到朋友的阻止。「朋友個個話奢侈，老人家思想亦較保守，話以前啲人大肚只會遮住個肚，點會打開俾人影相？但見個肚漸漸大，又真係好想留番個紀念，因為我無諗住生好多個，難得有BB 自然要好好把握機會。好彩老公好隨和，仲陪埋我去影！」
■原來Kammy 一直無買孕婦裝，拍攝當日只是簡單的穿Top 加牛仔褲，效果亦不俗。
最愛黑白系列
■拍攝後可先即時揀相，修改後讓客人再揀。
原來Kammy 未懷孕前的職業就是Model ，擺Pose 應該駕輕就熟，但她說其實拍孕婦寫真跟模特兒拍照有好大分別。「以前做Model 影相就要將本身嘅缺點避重就輕，又或突出產品優點。但影孕婦寫真就只有一點，最緊要突出個肚，影到個肚夠大夠靚。多組相片中我最鍾意黑白系列，因為好有藝術Feel ，唔使點修改都好似整咗特別效果一樣。」
私家道具獨一無二
另一對夫婦Joey 跟太太，選擇了剛過去的情人節留倩影，最特別是他們花臣多多，又自備愛的項鏈並於情人節登報，這些都變成拍攝道具，顯得相片更獨一無二。
■夫婦自己帶來的頸鏈，象徵精子卵子的結合。
■Joey 特地於情人節登報紀念，還將報紙拿去作道具影相。
攝影師：簡單就是美
■KK 話曾有客人拎了一大疊甫士照，叫攝影師跟足來影，非常有趣。
Sense Production 的攝影師KK 話孕婦在懷孕8至9個月影大肚相最美。「除非係孖胎最遲要7個月影，否則少於8個月個肚太細似肚腩，我見過有啲喺9個月上嚟影，過幾日即刻生。」說到最難忘，KK 話曾遇過位不想露肉的準媽媽。「個客話唔想露肚影相，我過下呆咗，最後有影肚但唔見樣。我仲見過老爺奶奶、或已有小朋友嘅一齊影，好似全家福咁。」KK 話孕婦的衣著宜簡單，簡單的Tube Top 已經很美。「大肚婆影相要突出肚的弧度，我建議著Top 或Aerobic 衫，大膽啲嘅可自備三點式。孕婦自備私伙小道具，影起嚟更有Feel ，因呢啲係佢哋獨一無二嘅紀念品。」
潮流興拍肚
■孫泰英
早前韓國女星金喜善及孫泰英都趁大肚拍寫真，顯現懷孕之美。而香港也有不少藝人曾拍懷孕照。
■金喜善
■劉美娟
孕婦寫真二千有找
■若客人要求做埋相簿，他們亦會度身設計。
香港家庭生小朋友一個起兩個止，想影孕婦寫真都只有一兩次機會，由現在至12月31日，Sense Production 推出孕婦寫真優惠，若想留個紀念就要把握。
價錢：$1,990（星期六、日及公眾假期加$300）地點：柴灣利眾街22號光榮工業大廈7樓全層拍攝時間：1-2小時相片數目：25張4×6吋相片網址：http://www.baby-dreamland.com查詢：28388544
