A 股收復海嘯後失地，完成第一個升浪，終於出現調整。A 股大升時，港股唔跟，A 股回落時，港股就跟到足；恆指噚日就大跌510點，13000大關又再失守。港股上周二曾逼近14000關口，現時已回落近千點，調整隨時會完成。在中央全力振興經濟下，A 股已見底回升，升後調整好正常，相信整固三幾日後，又可再展升浪。港股之前唔跟A 股，升勢主要係受歐美股市拖累，噚日就係人人睇淡假後美股走勢，掟定先。不過，港股始終背靠大陸，A 股調整後再上，對港股必然有帶動作用，恆指落到12500至12700水平應有支持，可入市博反彈。A 股有番生氣，指數升兩成有多，而好多股票升幅更以倍計，有投資A 股嘅上市公司，身家亦厚番好多。深圳國際（152）就趁好市，在高位沽咗508萬股南玻集團A 股，平均價為13.21元（南玻股價為人民幣．下同），高低價分別為13.60元及12.74元。
現金多可大展拳腳
南玻去年11月曾跌到6元，上周五回升到高價14.18元，噚日跟市回落，收12.50元，仍比低位反彈一倍有多。深國去年7月15日股東特別大會向董事會授出出售授權後，由於市況低迷，公司一直未有行動，到上周南玻回升一倍後才開始沽售，時機拿
得好好。到現時為止，深國仍持有1.28億股南玻股份，佔南玻10.35%，以昨日收市價計，市值為16億元人民幣，約18億港元。日後A 股升勢再起，深國所持南玻市值亦水漲船高，相信深國越沽越高，獲利會好可觀。深國主要業務係經營高速公路及物流園，資產豐厚，現時每股單係佔南玻已值12.8仙，A 股回升確係對深國好有利，難怪近期股價表現比大市為強。過去兩個月，深國在0.30元至0.40元間上落，前日升上0.35元，已開始拋離3條平均線，噚日跟市調整，形成旗形，一升破0.35元阻力，便要追進，初步睇0.40元，整固後再上，目標指向0.60元。去年底提過，廣東將大力發展水利項目，深國會有份，聽聞好事漸近，現時深國手頭上有淨現金16億元，正好大展拳腳。郭兆誠
http://appledaily.atnext. ... art_id=12219670
