淡掃眉、大眼仔、搽薄粉、水晶甲
劉心悠收得adidas 贊助，週日跑馬拉松都要gel 晒甲黐晒閃石兼戴對啡色大眼con.，心悠話：「戴有色隱形眼鏡係唔方便，不過影相時精神啲嘛！」
週日（8 日）5 萬幾人參加渣打馬拉松，要爭排頭位真係迫過行花市。好在劉心悠同欣宜老外男友Mark Ryan 就有adidas 安排專車接到起點，留定靚頭位畀傳媒影靚相，其他跑手得個恨字。
贊助商識做，心悠亦交足貨，唔驚跑得慢最緊要影到相，長跑同做騷，有時好難分嘅！
贊助騷
心悠開跑前仲孖住同樣係adidas 贊助嘅欣宜男友Ryan 響布景板前做熱身騷，連飲水個水壺都係贊助產品，仲連招紙都未搣，心悠確係識do ！
慢跑留影
當日劉心悠（箭嘴）參加的十公里公開賽吹雞起跑，成班運動員撼撼聲起跑，反而佢就慢慢踱步，影張靚相緊要呀！
賽事當日，贊助商adidas 安排劉心悠拍住欣宜男友Mark Ryan 凌晨4 點開記招晒新裝，心悠仲話對鞋係度身訂做，但跑長途新鞋未必啱腳形，不過心悠就勁賣口乖話：「佢哋唔係第一年贊助我，呢個系列係度身做，所以唔會有問題。」
雖然跑步流大汗，但劉心悠就靚樣最緊要，成套新款長袖運動裝上陣，仲要戴埋color con.、黑色閃石gel 甲加nude 妝，心悠話：「我冇化妝呀，只係戴con.，知你哋（記者）嚟，戴咗影相精神啲嘛，啲gel 甲係去台灣宣傳時整㗎，我星期五晚先返嚟冇時間拆咋！」但最後心悠比去年跑慢咗成16 分鐘先衝線，唔知關唔關對con.事呢？
上週三（4 日）劉心悠仍身在台灣為電影《愛到底》宣傳，其間她亦有在酒店練跑，心悠話女性跑步要揀啱bra ：「一定要揀啲高承托力，唔怕會chok 親胸部神經，痛餐死。」
晶片（箭嘴）須在開跑前用鞋帶固定，方可在起跑同終點計時。
Mark Rayn 排頭位亦順利以首名衝線稱霸10 公里賽，完全靠實力同排位無關。
排頭位冇so
當日香港馬拉松十公里賽，心悠同Mark Ryan 都俾adidas 帶去前排位，但其實每位選手鞋面鑲有晶片計時，由起跑後先計時，所以排得前其實冇乜so ，係方便記者影相囉！
