楊怡和謝天華日前為無
新劇《占星情緣》拍攝外景，劇情講述二人情侶檔參加踢毽比賽。鏡頭前他們合作無間，但鏡頭一轉二人就「狗咬狗骨」，互相整蠱又用毽互掟，二人像大細路一樣，認真搞笑。
在劇中楊怡將與謝天華及馬浚偉發展三角戀，問到她與謝天華有否親熱鏡頭？她即抵死笑謂：「冇呀，謝天華好想，但係我唔畀。（係咪佢成日整蠱你？）係啦，佢係巨蟹座，成隻軟殼蟹咁，鬼咁賴皮！」
唔抗拒親熱戲
而拍檔謝天華則反指楊怡男仔頭，經常打到他周身瘀，他說：「之前佢睇完《葉問》返嚟搵我打詠春，每晚返屋企，老婆問我點解周身瘀，其實我就係畀楊怡、曹敏莉車輪戰咁打，不過打嚟打去好好玩。（老婆會唔會介意？）唔會，梗係冇嘢先玩得咁癲，當佢男人咁玩。（楊怡話你想加咀戲？）佢都幾識幻想，如果劇情需要，我都唔介意，我都未試過同男人咀嘛。」
有姿勢有實際
拍攝時二人表現得有板有眼，平時姐手姐腳的楊怡原來自小就有踢毽，怪不得有姿勢有實際，她說：「細個成日同家姐跳橡筋繩、踢毽，閒閒哋可以連續踢十幾下，不過之前同謝天華拍嘢，畀佢用個毽『省』到塊面，佢不知幾內疚。」
文：影視組
楊怡與謝天華（右）雖然首次合作，不過一拍即合。
楊怡踢毽有姿勢有實際，輕易踢到十數下。
謝天華在鏡頭後經常與楊怡「打交」，搞到周身瘀痕。
