好彩William 已經有咗Angelababy 啫，如果唔係，見到Sherman （右）同佢咁咬耳仔法，一定又爆粉紅新聞啦。
跟紅頂白，係放諸四海皆準，尤其娛樂圈。31 號（上周六）嗰日，英皇響西九龍中心搞咗個新春簽名會，媽咪姐第一時間走去趁熱鬧，當日除咗林峯、王祖藍同泳兒之外，仲有鍾舒漫（Sherman ）、張致
（Steven ）同陳偉霆（William ）。
影大合照時，Sherman 同Steven 一個街頭、一個街尾，尤其Sherman ，完全無視Steven ；反而不斷做攝位人，攝埋William 身邊（右圖）。
大紅人William 雖然春風滿面，但唔知係咪因為太過火熱，搞到爆瘡。唔怪得會場入面熱到死佢都唔除圍巾。原來要遮住啲瘡。
嘩，嗰日又真係幾墟撼，難怪嘅，林峯係當紅小生、王祖藍又有勢，不過論人氣，William 更加唔使講，新人王喎，班妹妹仔fans 一見到佢就嗌到拆天咁滯，梗係勁啦；而冇乜嘢撈嘅Steven 無論影大合照抑或簽名，都俾安排做「邊緣人」，真係眼細啲都幾乎睇佢唔到咁滯，邊個紅邊個霉炖炖明眼人一眼已睇出。
就媽咪姐所見，曾經俾《忽周》踢爆同Steven 「同出同入」嘅Sherman ，當日同Steven 完全零交流不特止，更係成日黐響著到紅噹噹嘅William 身邊，扮晒投契咁。
咁又難怪嘅，俾著你，同個紅人同一場合，唔黐響紅人身邊，第日想有張相見吓報都難。Sherman 今勻真係名副其實「跟紅頂白」。
Nike SB Dunk Ultimate Glory$1,599
林峯贏人氣輸個look
同一場合，論人氣，林峯同William 絕對有得揮，可惜論衣著，林峯肯定輸幾條街。媽咪姐唔想講太多，留番fans 自己做判斷。
林峯對鞋靚就靚啦，可惜襯條吊腳褲，不倫不類，不單一啲潮嘅感覺都冇，仲娘到震嗰隻添！
